Qeveria kubane njoftoi se 32 shtetas kubanë u vranë gjatë operacionit amerikan për kapjen e udhëheqësit të Venezuelës, Nicolás Maduro.
Autoritetet në Havana thanë se viktimat ishin anëtarë të forcave të armatosura dhe shërbimeve të inteligjencës, të vrarë “në veprime luftarake”, ndërsa u shpallën dy ditë zie kombëtare. Sipas ushtrisë kubane, ata “ranë pas rezistence të ashpër, në përleshje të drejtpërdrejta ose si pasojë e bombardimeve”.
Kuba, aleate e hershme e Venezuelës, prej vitesh i ka siguruar Maduros mbrojtje personale dhe ka personel të vendosur në strukturat ushtarake venezuelase. Presidenti kuban Miguel Díaz-Canel deklaroi se kjo mbrojtje ishte ofruar me kërkesë të autoriteteve të Venezuelës.
Sipas gjeneralit amerikan Dan Caine, shërbimet amerikane kishin monitoruar për muaj me radhë lëvizjet e Madur-os përpara operacionit. The New York Times raportoi gjithashtu se CIA kishte rekrutuar një burim venezuelian, i cili kishte dhënë informacion mbi vendndodhjen e saktë të tij.
Besohet se shumica e të vrarëve ishin pjesë e ekipit të ngushtë të sigurisë së Maduros. Venezuela nuk ka konfirmuar shifrën e saktë të viktimave, por sipas një zyrtari venezuelian të cituar nga The New York Times, numri total i të vrarëve ka arritur në rreth 80 dhe pritet të rritet, shifër që BBC News nuk e ka verifikuar në mënyrë të pavarur.
Lexo më tej: Shpjegimi/ Pse SHBA sulmoi Venezuelën dhe arrestoi presidentin Maduro
Pas kapjes së Madur-os, janë shtuar spekulimet nëse administrata Trump mund të ndërmarrë një veprim të ngjashëm edhe kundër Kubës. Presidenti amerikan Donald Trump deklaroi se ndërhyrja ushtarake nuk është e nevojshme, pasi “Kuba është gati të bjerë”.
Sekretari amerikan i Shtetit, Marco Rubio, e përshkroi Kubën si një “katastrofë”, ndërsa administrata Trump ka vijuar ashpërsimin e sanksioneve dhe embargon ekonomike ndaj ishullit, e vendosur që nga viti 1962, pavarësisht thirrjeve ndërkombëtare për heqjen e saj.
Përgatiti nga BBC në shqip ©LAPSI.AL
