Juventus i përgjigjet Romës dhe, në javën e nëntëmbëdhjetë të Serie A, mposht 3-0 Sassuolo. Nuk ishte gjithçka e lehtë, por për skuadrën e drejtuar nga Spalletti “dhurata” e bërë nga Muharemovic në pjesën e parë dhe dy shkëndijat e David në të dytën (asist për Miretti dhe gol) e bënë më të thjeshtë një transfertë që ishte ngarkuar me presion pas barazimit me Lecce.
Në Mapei Stadium, ndeshja zhbllokohet në minutën e 16’ falë autogolit të Muharemovic, i cili devijon me kokë në portën e tij një krosim të Kalulu. Brenda dy minutave në pjesën e dytë shpërthen njeriu më i diskutuar në shtëpinë bardhezi: Jonathan David, i hedhur titullar nga Spalletti pavarësisht gabimit nga pika e bardhë kundër Lecces, në minutën e 62’ shërben te Miretti topin e golit të 2-0, më pas vepron i vetëm duke shfrytëzuar gabimin në pasim mbrapa të Idzes dhe firmos golin e tretë. Me këtë sukses, pikët në fund të fazës së parë për Zonjën e Vjetër janë 36: vendi i katërt së bashku me verdhekuqtë, megjithëse me një gol më shumë në diferencën e golave. Në kuotën 23 mbetet, ndërkohë, skuadra e teknikut Grosso.
Juventus fitoi 3-0 ndaj Sassuolos, duke mbajtur ritmin e Romës në vendin e katërt të renditjes. Për Sassuolo, një humbje ndoshta e tepruar për atë që treguan lojtarët e teknikut Grosso në fazën mbrojtëse, por përpara ata nuk merituan kurrë një fat më të mirë. Ndërsa skuadra e drejtuar nga Spalletti ishte e aftë dhe e pjekur në menaxhimin e kohës dhe në shfrytëzimin e rasteve, duke përfituar edhe atë grimë fati që i kishte munguar herë të tjera.
LECCE 0-2 AS ROMA
Java e 19-të e Serie A vlen rikthimin te fitorja për Romën e teknikut Gian Piero Gasperini. Verdhekuqtë fitojnë 2-0 në Via del Mare kundër Lecce-s së Eusebio Di Francesco dhe e mbyllin kështu fazën e parë të kampionatit me 36 pikë në renditje: Gasp bëhet i gjashti që arrin 1.000 pikë në Serie A pas teknikëve Trapattoni, Rocco, Liedholm, Allegri dhe Spalletti.
Ai që zhbllokoi ndeshjen në tokën puljeze është Ferguson në minutën e 14’, i aktivizuar nga një prekje e çmuar e Dybala, ndërsa Pisilli sheh t’i anulohet goli i dytë për pozicion jashtë loje në minutën e 38’. Pierotti shpërdoron një rast të jashtëzakonshëm për barazim në minutën e 58’, përpara golit të 2-0 të shënuar nga Dovbyk në minutën e 71’, me asist të Pisilli. Humbja e lë Lecce në 17 pikë (me një ndeshje për t’u rikuperuar), sërish e mposhtur pas barazimit të marrë fundjavën e kaluar në fushën e Juventus.
PISA 0-3 COMO 1907
Como arrin vendin e katërt në renditje falë fitores 3-0 ndaj Pisës, me të cilën hapet java e nëntëmbëdhjetë e Serie A. Në Arena Garibaldi vendosin golat e Perrone, që shënon me të majtën nga jashtë zone në minutën e 68’, dhe Douvikas, i cili mbyll llogaritë në kundërsulm në minutën e 76’ pas asistit të Rodriguez. Neroverdhët do të kishin mundësinë ta rihapnin ndeshjen, por Nzola godet shumë keq penalltinë e akorduar për faull ndaj Leris, me Butez-in që qëndron në qendër dhe e pret. Nga pika e bardhë nuk gabon ndërkohë greku, i cili në minutën e 96’ realizon dygolëshin.
Serie A Italy
Pisa 0-3 Como 1907
Lecce 0-2 AS Roma
Sassuolo 0-3 Juventus
