Presidenti i Serbisë, Aleksandar Vuçiq, deklaroi të premten se pret që pikat kryesore të marrëveshjes mes Industrisë së Naftës së Serbisë (NIS) dhe kompanisë hungareze MOL të përfundojnë deri më 23 janar, afati i fundit i licencës së përkohshme të dhënë nga Shtetet e Bashkuara.
Në një intervistë për Radio-Televizionin e Serbisë, Vuçiq tha se grupi MOL pritet të bëhet partneri i ri strategjik i NIS-it, në përpjekje për ta nxjerrë kompaninë nga sanksionet amerikane.
Ai theksoi se MOL, së bashku me NIS-in dhe shtetin e Serbisë, ka përgatitur dokumentacion për Zyrën amerikane për Kontrollin e Pronës së Huaj (OFAC), me qëllim sigurimin e një licence operative për furnizim shtesë me naftë të papërpunuar.
“Nëse shkojmë me këto çështje para OFAC-ut dhe ai e aprovon marrëveshjen, NIS-i do të mund të vazhdojë punën. Në të kundërtën, kompania do të mbetet sërish pa licencë”, deklaroi Vuçiq.
OFAC nisi më 9 tetor zbatimin e sanksioneve ndaj NIS-it për shkak të pronësisë shumicë nga kompanitë ruse Gazprom dhe Gazprom Neft, me synimin për të penguar përdorimin e të ardhurave energjetike ruse për luftën në Ukrainë.
Kushti kryesor i SHBA-së për heqjen e sanksioneve është largimi i kapitalit rus nga struktura e pronësisë së NIS-it.
Aktualisht, kompanitë ruse zotërojnë 56.15% të aksioneve të NIS-it, shteti serb 29.87%, ndërsa pjesa tjetër është në pronësi të aksionarëve më të vegjël.
Për shkak të sanksioneve dhe pamundësisë për të importuar naftë të papërpunuar, më 2 dhjetor u mbyll Rafineria e Pançevës, e vetmja në Serbi.
Megjithatë, më 1 janar, NIS njoftoi se kishte marrë një licencë të veçantë nga Departamenti amerikan i Thesarit, e cila lejon rifillimin e aktiviteteve deri më 23 janar.
Vuçiq tha se më 5 janar NIS do të jetë në gjendje të paguajë dhe të transportojë 85 mijë tonë naftë të magazinuar në Omish të Kroacisë, si dhe të porosisë një tanker me 140 mijë tonë të tjera. Ai shtoi se Rafineria e Pançevës mund të punojë me kapacitet të plotë nga 20 janari.
Industria e Naftës së Serbisë është shitur te Gazprom-i në vitin 2008 për 400 milionë euro, ndërsa vlera aktuale e pjesës ruse nuk është bërë publike.
NIS furnizon rreth 80% të tregut serb me derivate të naftës, ndërsa Serbia mbetet gjithashtu shumë e varur nga Rusia për furnizimin me gaz natyror.
Serbia është kandidate për anëtarësim në Bashkimin Evropian që nga viti 2012, por nuk i është bashkuar sanksioneve të BE-së ndaj Rusisë për shkak të pushtimit të Ukrainës.
