Brian King Joseph, violinist profesionist dhe ish-garues i America’s Got Talent, ka ndarë një video domethënëse në rrjetet sociale vetëm pak ditë para se të ngrinte zyrtarisht një padi ndaj aktorit Will Smith dhe kompanisë së tij, Treyball Studios Management, Inc.
Joseph dorëzoi padinë të martën, më 30 dhjetor, në Gjykatën e Lartë të Kalifornisë, në Qarkun e Los Anxhelosit, duke akuzuar aktorin për ngacmim seksual, largim të padrejtë nga puna dhe hakmarrje. Në dokumente, ai pretendon se Smith “po e përgatiste dhe manipulonte qëllimisht” për shfrytëzim të mëtejshëm gjatë turneut botëror Based on a True Story në mars 2025.
Më 25 dhjetor, Joseph publikoi një video në Instagram ku la të kuptohej për situatën ligjore, pa përmendur emra. “Në fillim të këtij viti u punësova për një turne shumë të madh me një figurë të njohur të industrisë. Ishte një mundësi e madhe për mua, por fatkeqësisht ndodhën disa gjëra,” u shpreh ai.
Ai shtoi se nuk mund të hynte në detaje për shkak të procesit ligjor, por theksoi se largimi nga puna, kërcënimet apo presioni ndaj dikujt që raporton sjellje të papërshtatshme në vendin e punës “nuk janë të pranueshme”.
Në padi, Joseph përshkruan një seri ngjarjesh traumatike që, sipas tij, ndodhën gjatë qëndrimit në Las Vegas. Ai pretendon se dhoma e tij e hotelit ishte hapur pa shenja dhune dhe se aty kishte objekte dhe një shënim që ai i konsideron kërcënues. Pas raportimit të incidentit te stafi i hotelit, autoritetet lokale dhe menaxhmenti i turneut, Joseph thotë se u përball me turpërim dhe më pas u largua nga puna, ndërsa një violinist tjetër u punësua për ta zëvendësuar.
Sipas padisë, ngjarja i ka shkaktuar dëme emocionale, financiare dhe reputacionale, përfshirë probleme serioze të shëndetit mendor.
Nga ana tjetër, avokati i Will Smith ka mohuar kategorikisht akuzat. “Pretendimet ndaj klientit tim janë të pavërteta, të pabazuara dhe të pamatura,” deklaroi ai, duke shtuar se do të ndiqen të gjitha rrugët ligjore për të zbardhur të vërtetën.
