Një ngjarje e rëndë është shënuar mbrëmjen e sotme në lagjen “Luigj Gurakuqi”, pranë stadiumit “Elbasan Arena”, ku një person është gjetur pothuajse i djegur plotësisht në një ambient të përshtatur si banesë, në katin e parë të një pallati.
Policia sqaroi se bëhet fjalë për një 66-vjeçar të identifikuar si Edmond Angjeli. Dyshohet se ai ka rënë në kontakt me rrymën elektrike në banesën e tij dhe si pasojë ka humbur jetën.
"Grupi hetimor ndodhet në vendngjarje dhe po punon për sqarimin e rrethanave dhe dokumentimin ligjor të rastit" - deklaron policia.
Ishin shërbimet zjarrfikëse që ndërhynë pasi banorët e pallatit kanë sinjalizuar praninë e erës së djegies dhe tymit. Zjarrfikësit kanë hapur me forcë qepenin e ambientit, ku kanë gjetur 66-vjeçarin në gjendje të rëndë shëndetësore.
Prej rreth një ore, energjia elektrike është ndërprerë në një pjesë të bllokut të banimit në lagjen “5 Maj”, si masë sigurie. Nga të dhënat paraprake dyshohet se personi mund të ketë rënë aksidentalisht në kontakt me rrymën elektrike, por autoritetet nuk përjashtojnë as pistën e një tentative vetëvrasjeje. /LAPSI.al
