Benfica barazon 2-2 në Braga dhe zgjat serinë e saj pa humbje në 10 ndeshje (humbja e fundit në Champions në fillim të nëntorit ndaj Bayer Leverkusen), por rrezikon të largohet më tej nga kreu i kampionatit, pasi Porto luan në mbrëmje në shtëpi ndaj AFS-së së fundit dhe, në rast fitoreje, do të ngjitej në kuotën 46, pra +10 nga skuadra e Lisbonës. Barazimi në Braga solli polemika për golin e anuluar ndaj skuadrës së teknikut Jose Mourinho në fund, një gol, videon e të cilit klubi bardhekuq e publikoi në rrjetet sociale me mbishkrimin “goli i fitores së Benfica ndaj Bragës”.
Një fitore “imagjinare” që u “festua” edhe nga José Mourinho në intervistën pas ndeshjes, kur befasoi gazetarin e televizionit portugez që e pyeti për barazimin.
Mourinho pas barazimit në Braga: “Kemi fituar 3-2, fitore e madhe”
“Mendoj se është një fitore e madhe – u përgjigj i sigurt ‘Special One’ – Në pjesën e dytë ishte vetëm Benfica, të përmbysësh rezultatin dhe të fitosh këtu 3-2 është fantastike për ne. Lojtarët e meritojnë për përpjekjen, me gjithë respektin për Bragën që na vuri në vështirësitë që prisnim”.
Gazetari ia ktheu duke thënë se Mourinho ndoshta kishte ndjesinë se skuadra e tij e meritonte fitoren, por trajneri 62-vjeçar këmbënguli serioz: “Kemi fituar 3-2. Goli është i rregullt, kemi fituar, është një fitore e madhe.”
“E vërteta është se në fund të ditës renditja i jep vetëm një pikë më shumë Benfikës”, ia ktheu intervistuesi. Në atë moment Mourinho u largua, duke përsëritur katër herë: “kemi fituar”.
Debatet në konferencën për shtyp
Në konferencën për shtyp më pas, ish-trajneri i Interit dhe Romës shpjegoi reagimin e tij ironik: “Ka qenë një pjesë e dytë shumë e mirë dhe kemi fituar 3-2 – tha fillimisht, pastaj u bë serioz – Natyrisht e dini që po flas me ironi. Nëse nuk do ta bëja, do të sanksionohesha rëndë. A do të bëjë klubi një deklaratë? Nuk e di. Unë stërvis dhe kaq. Nuk bëj vlerësime. Për mua ishte një ndeshje shumë pozitive, por shpesh ndeshjet dhe pikët vendosen nga këto lloj vendimesh, dhe kjo është ajo që ndodhi.”
