Presidenti i Shteteve të Bashkuara, Donald Trump, njoftoi se forcat amerikane kanë kryer një “sulm të fuqishëm dhe vdekjeprurës” kundër elementëve të organizatës terroriste ISIS në veriperëndim të Nigerisë. Në një postim në rrjetin social Truth, Trump shkroi se operacioni u krye me urdhër të tij dhe kishte në shënjestër militantë të ISIS-it, të cilët, sipas tij, “kanë synuar dhe vrarë brutalisht, kryesisht të krishterë të pafajshëm”.
Sipas presidentit amerikan, Pentagoni realizoi “sulme të shumta precize”, ndërsa autoritetet nigeriane konfirmuan se bëhej fjalë për sulme ajrore të koordinuara kundër objektivave terroriste. “Nën udhëheqjen time, vendi ynë nuk do të lejojë që terrorizmi radikal islamik të lulëzojë,” shkroi Trump, duke shtuar një mesazh për Krishtlindjet dhe duke theksuar se operacionet do të vazhdojnë nëse dhuna ndaj civilëve nuk ndalet.
Komanda e Shteteve të Bashkuara për Afrikën (AFRICOM) njoftoi se sulmi u krye me kërkesë të autoriteteve nigeriane dhe kishte në shënjestër elementë të ISIS-it në shtetin Sokoto, duke rezultuar në vrasjen e disa militantëve. Në një postim në platformën X, AFRICOM deklaroi se këto veprime “demonstrojnë forcën e ushtrisë amerikane dhe angazhimin për eliminimin e kërcënimeve terroriste ndaj amerikanëve, brenda dhe jashtë vendit”.
Edhe Sekretari amerikan i Mbrojtjes, Pete Hegseth, reagoi duke theksuar se presidenti kishte paralajmëruar më herët se dhuna ndaj të krishterëve në Nigeri “duhet të marrë fund”. Ai shtoi se Departamenti i Mbrojtjes është gjithmonë i gatshëm të veprojë dhe shprehu mirënjohje për bashkëpunimin e qeverisë nigeriane. Nga ana e saj, Ministria e Jashtme e Nigerisë konfirmoi se Shtetet e Bashkuara kryen “sulme precize ajrore kundër objektivave terroriste” në veriperëndim të vendit. Në një deklaratë zyrtare, ajo theksoi se autoritetet nigeriane mbeten të përkushtuara ndaj bashkëpunimit të strukturuar të sigurisë me partnerët ndërkombëtarë, përfshirë SHBA-në, për të përballuar kërcënimin e vazhdueshëm të terrorizmit dhe ekstremizmit të dhunshëm.
