Gjykata e Lartë e Shteteve të Bashkuara ka refuzuar kërkesën e Presidentit Donald Trump për të lejuar vendosjen e Gardës Kombëtare në Çikago, me qëllim mbrojtjen e agjentëve të ICE.
ICE (Immigration and Customs Enforcement) është një agjenci federale amerikane, pjesë e Departamentit të Sigurisë Kombëtare (DHS).
Vendimi përbën një humbje të rrallë dhe të rëndësishme për administratën Trump në axhendën emergjente të një gjykate me shumicë konservatore.
“Në këtë fazë paraprake, qeveria nuk ka arritur të identifikojë një burim autoriteti që do t’i lejonte ushtrisë të zbatojë ligjet në Illinois,” thuhet në vendimin e nënshkruar pa emra nga gjykata. Vendimi u mor me kundërshtimin e gjyqtarëve konservatorë Samuel Alito, Clarence Thomas dhe Neil Gorsuch.
Ky zhvillim konsiderohet një pengesë serioze për Shtëpinë e Bardhë dhe pritet të vështirësojë edhe vendosje të ngjashme të Gardës Kombëtare në qytete të tjera amerikane.
Në një reagim për CNN, zëdhënësja e Shtëpisë së Bardhë, Abigail Jackson, deklaroi se vendimi nuk do ta ndalë Presidentin Trump në përpjekjet për të zbatuar ligjet e emigracionit dhe për të mbrojtur personelin federal. “Ai aktivizoi Gardën Kombëtare për të mbrojtur oficerët federalë dhe për të siguruar që protestuesit të mos shkatërronin ndërtesa dhe prona federale,” tha ajo.
Eksperti i Gjykatës së Lartë për CNN dhe profesori i së drejtës në Universitetin Georgetown, Steve Vladeck, e quajti vendimin “një refuzim të fortë” të përpjekjeve të Trump për të përdorur trupa federale në mbështetje të zbatimit të ligjeve të emigracionit, veçanërisht në shtete të drejtuara nga demokratët. Sipas tij, kjo është “humbja më e madhe që Gjykata e Lartë i ka shkaktuar Trump-it këtë vit”.
Në thelb të çështjes ishte interpretimi i një ligji federal që lejon presidentin të federalizojë Gardën Kombëtare kur nuk është më në gjendje të zbatojë ligjet me “forcat e rregullta”. Gjykata sqaroi se ky term i referohet ushtrisë së rregullt dhe jo agjencive civile si ICE, duke lënë të kuptohet se ky autoritet nuk vlen për mbrojtjen e agjentëve të emigracionit.
Megjithatë, vendimi nuk ia heq të gjitha opsionet Presidentit. Trump mund të përdorë ende Aktin e Kryengritjes për të vendosur trupa të rregullta, edhe pse një hap i tillë konsiderohet politikisht i ndjeshëm, pasi sfidon ndalimin tradicional të përdorimit të ushtrisë për zbatimin e ligjit.
Vendimi vjen në një kohë kur tensionet rreth një qendre të ICE pranë Çikagos janë zbutur dhe administrata ka reduktuar gradualisht praninë e trupave. Megjithatë, çështja mbetet një provë e rëndësishme për kufijtë e pushtetit presidencial në përdorimin e Gardës Kombëtare brenda qyteteve amerikane.
