Nga “enfant prodige” në të tepërt, hapi ishte shumë i shkurtër: vetëm 5 muaj. Parabola e Endrick te Real Madrid mund të përmblidhet kështu nga gushti i kaluar deri më sot, me talentin e ri brazilian të detyruar të largohet nga klubi që e solli në Evropë dhe që, në projektin teknik të Xabi Alonso, u la shpejt në stol. Kështu erdhi vendimi në prag të merkatos së dimrit: lamtumirë Real, lamtumirë La Liga. Endrick do të luajë te Lyon, në Ligue 1, në huazim, me klubin francez që do të mbulojë gjysmën e pagës së tij deri verën e ardhshme. Atëherë Endrick duhet të ketë rikthyer minuta, gola dhe paraqitje, me një objektiv të qartë: të bindë mentorin e tij të dikurshëm te Real, Carlo Ancelotti, që ta thërrasë sërish në Kombëtare për Botërorin 2026.
Endrick e lë zemrën te Real: “Fitoni La Liga dhe Champions”
Asnjë lamtumirë përfundimtare, asnjë polemikë, vetëm zgjedhja për të ndryshuar menjëherë ambient, duke falënderuar por pa hezitime që mund të rezultonin fatale. Kështu përfundon për momentin aventura e Endrick me Real Madrid, ku i ka përshëndetur shokët e skuadrës me një “mirupafshim”, siç zbulojnë kronikat spanjolle: “Do të bëj tifo për ju, fitoni La Liga dhe Champions dhe unë do të festoj”, thuhet se ka thënë mes përqafimeve në dhomën e zhveshjes. Një dhomë zhveshjeje që ishte shndërruar në burg për të lindurin në 2006, në kërkim të besueshmërisë së re, që do ta gjejë te Lyon.
Endrick, nga xhevahir i Ancelottit në tepricë për Xabi Alonso
Në sezonin e tij të dytë me Real, Endrick ka parë të bien ndjeshëm aksionet e tij në skuadër: ka grumbulluar vetëm 99 minuta nën drejtimin e spanjollit Xabi Alonso, të shpërndara në tri paraqitje anonime. Vetëm 11 minuta në Champions (kundër Manchester City), po aq në La Liga (kundër Valencias) dhe 77 në Kupën e Mbretit (kundër Talaveras). Thërrime që nuk i kanë lejuar vazhdimësi dhe ngjitje në hierarkinë e sulmit të Real. Një involucion alarmues në krahasim me numrat e menaxhimit Ancelotti, ku Endrick ishte në qendër të projektit: në fund të sezonit kishte luajtur 37 ndeshje gjithsej, duke shënuar 7 gola (5 në Kupën e Mbretit) dhe një asist.
Endrick te Lyoni me një objektiv: të shkojë në Botëror
Endrick ka zgjedhur Lyon për të rifilluar të ëndërrojë. Në moshën 19-vjeçare dëshiron të rifitojë edhe një vend në Brazil, ku trajner është pikërisht Carlo Ancelotti, gati ta përqafojë sërish, por pa asnjë zbritje. Ai ka lënë jashtë edhe yje si Neymar apo Vinicius, duke bërë zgjedhje edhe jopopullore për të gjetur formulën perfekte me të cilën të paraqitet në Botërorin e ardhshëm me një Brazil fitues. Ky është edhe objektivi i Endrick, që e di si t’i prekë telat e shpirtit të ish-trajnerit të tij: duke luajtur. Kështu, me huazimin e thatë deri në fund të sezonit, në Lion do të provojë të rilindë. Për kënaqësinë edhe të klubit francez, që nuk i paguan asgjë Realit përveç 50% të pagës, rreth 2 milionë euro.
