Një armë zjarri është gjetur pranë qendrës së qytetit të Sarandës, duke shkaktuar shqetësim tek banorët e zonës. Arma, e llojit pistoletë “TT”, është konstatuar nga tre fëmijë të mitur, të cilët po luanin në vendin e njohur si “15 katëshi”, në rrugën “Onhezmi”.
Sipas informacioneve paraprake, arma e zjarrit ndodhej e futur brenda një çante dore. Pas njoftimit, në vendngjarje kanë mbërritur forca të shumta policie, të cilat kanë rrethuar zonën dhe kanë marrë armën si provë materiale.
Policia ka nisur hetimet për të identifikuar personin që ka hedhur armën e zjarrit në rrugë, ndërsa priten verifikime të mëtejshme për të zbardhur rrethanat e plota të ngjarjes.
