Idris Elba ka zbuluar se po planifikon të largohet gradualisht nga aktrimi, megjithëse nuk ka ndërmend t’i kthejë shpinën Hollywood-it.
Gjatë pjesëmarrjes së tij në Red Sea International Film Festival në Arabinë Saudite, aktori i njohur tregoi se po synon t’i përkushtohet më shumë punës pas kamerave.
“Shpresoj që fansat e mi të mos mërziten me mua. Por në një moment, dua të kaloj plotësisht në regji,” u shpreh ai gjatë një sesioni pyetje-përgjigje.
“Kam shumë vite që aktroj. E dua ende, por regjia më lejon të përdor aftësi të tjera dhe të jem pjesë e xhirimeve në një mënyrë krejt ndryshe. E shijoj shumë,” shtoi Elba.
Elba ishte i pranishëm në festival për të promovuar Dust To Dreams, një film i shkurtër që ai vetë e ka drejtuar. Filmi zhvillohet në Lagos të Nigerisë dhe trajton marrëdhënien mes një nëne dhe vajzës së saj adoleshente, e cila takohet për herë të parë me të atin.
Ky nuk është projekti i tij i parë si regjisor. Elba ka drejtuar më herët dy episode të serisë Playhouse Presents të Sky Arts, ndërsa debutimin në regji e ka bërë në vitin 2018 me filmin Yardie, bazuar në romanin që tregon historinë e një tregtari droge nga Xhamajka në Londrën e viteve ’80.
