Dy avionë luftarakë amerikanë u gjurmuan duke fluturuar rreth Gjirit të Venezuelës të martën, ndërsa tensionet vazhdojnë të përshkallëzohen midis dy vendeve.
Aeroplanët F/A-18 Super Hornets u shfaqën në vendet e gjurmimit të fluturimeve pranë Maracaibo, qytetit të dytë më të madh të Venezuelës. Ata raportohet të kenë fluturuar rreth Gjirit për rreth 40 minuta.
Një zyrtar i mbrojtjes amerikane i ka thënë Associated Press se avionët F/A-18 kishin kryer një "fluturim rutinë stërvitor" në zonë.
Incidenti vjen mes një vale sulmesh amerikane kundër anijeve në Detin e Karaibeve, për të cilat Shtëpia e Bardhë thotë se po trafikonin drogë drejt SHBA-së nga Venezuela.
Ekspertët kanë ngritur pyetje mbi ligjshmërinë e sulmeve, të cilat kanë vrarë më shumë se 80 persona.
Presidenti i Venezuelës, Nicolas Maduro, ka akuzuar SHBA-në se po i përdor sulmet për të destabilizuar vendin dhe për ta rrëzuar atë nga pushteti.
Në një intervistë të zhvilluar me “Politico” një ditë para se avionët luftarakë të afroheshin në vijën bregdetare të Venezuelës, Trumpi ka deklaruar se ditët e Maduros në pushtet janë “të numëruara” dhe nuk pranoi të komentonte nëse trupat amerikane mund të vendoseshin në vend.
Një avion tjetër, EA-18G Growler, u shfaq gjithashtu pak para F/A-18 në faqen e gjurmimit FlightRadar24.
Të dhënat tregojnë se avioni fluturoi në unaza në veri të bregdetit të Venezuelës.
Veprimet janë të fundit në një numër aktivitetesh të pazakonta të forcave ajrore amerikane që janë gjurmuar që nga shtatori. Bombarduesit B-52 Stratofortress dhe B-1 Lancer më parë fluturuan lart dhe përgjatë bregdetit të Venezuelës.
