Protestat e fermerëve në Greqi kanë prodhuar sot tensione të forta dhe incidente të përsëritura në disa rajone të vendit, ndërsa bllokadat po zgjerohen në një pjesë të konsiderueshme të territorit, duke prekur rrugë kryesore, aeroporte dhe porte detare.
Në Hania, fermerët arritën të bllokonin aeroportin “Ioannis Daskalogiannis”, pas përleshjeve të ashpra me policinë. Pamje të publikuara nga vendngjarja treguan protestues që përdornin shkopinj tradicionalë kretas, të njohur si “katsounes”, për të sulmuar trupat e policisë së trazirave. Si përgjigje, policia përdori gazra dhe kimikate, ndërsa demonstruesit reaguan duke hedhur gurë dhe duke përmbysur një automjet policie. Porta kryesore e aeroportit u mbyll rreth orës 14:30, duke bllokuar hyrjen dhe daljen e udhëtarëve, me përjashtim të rasteve të emergjencave shëndetësore.
Tensione të ngjashme u regjistruan edhe në Karditsa, ku fermerët, të shoqëruar me një numër të vogël traktorësh, u përballën me policinë jashtë zyrës së Ministrit të Zhvillimit Rural, Kostas Tsiaras. Protestuesit u irrituan pasi panë që policia kishte mbyllur rrugën drejt godinës, duke shkaktuar përplasje verbale dhe shtyrje.
Në Heraklion, situata u përshkallëzua kur fermerët çanë kordonin e policisë dhe hynë në pistën e aeroportit. Si pasojë, dhjetë fluturime të planifikuara u anuluan, duke shkaktuar kaos në transportin ajror. Bllokadat në infrastrukturën rrugore krijuan trafik të rënduar në disa zona të qytetit, veçanërisht në pjesën lindore, duke prekur Nea Alikarnassos, Katsambas, Poros dhe qendrën urbane. Pasagjerët, për shkak të barrikadave, u detyruan të mbërrinin në aeroport në këmbë, duke bartur bagazhet me duar.
Protestat prekën edhe portin e Mytilenës, ku fermerët, pas një organizimi të paravendosur, rreshtuan automjetet për të bllokuar tre hyrjet dhe daljet kryesore, duke ndalur trafikun detar.
Lëvizje e gjerë rurale, e cila ka nisur si reagim ndaj politikave të qeverisë për subvencionet dhe kostot e prodhimit, po shndërrohet në një valë presioni të drejtpërdrejtë mbi infrastrukturat kritike dhe aktivitetet ekonomike, me pasoja që tashmë ndihen në transport, turizëm dhe logjistikë.
