Thomas Tuchel ka zbuluar se Anglia mund të përdorë masa krejtësisht të paprecedentë në Kupën e Botës 2026 për të përballuar të nxehtin ekstrem të parashikuar në Meksikë, Shtetet e Bashkuara dhe Kanada. Trajneri i Three Lions ka shpjeguar se kushtet klimatike mund ta detyrojnë stafin të marrë vendime që nuk janë konsideruar kurrë më parë.
Sipas studimeve më të fundit, shumë nga gjashtëmbëdhjetë vendet pritëse të turneut – mes Shteteve të Bashkuara, Kanadasë dhe Meksikës – hyjnë në kategorinë e “rrezikut shumë të lartë termik”, me temperatura që mund t’i vënë seriozisht në provë sportistët dhe tifozët. Për këtë arsye, Tuchel nuk përjashton mundësinë për t’i mbajtur lojtarët rezervë në dhomat e zhveshjes, në vend që të jenë në pankinë, në mënyrë që t’i mbrojë nga ekspozimi i zgjatur ndaj të nxehtit mbytës.
Tuchel, strategji të paprecedentë kundër të nxehtit ekstrem
“Nëse kjo mund të na ndihmojë në minutat e fundit të ndeshjeve, duhet ta vlerësojmë seriozisht”, – ka deklaruar ai për BBC-në, duke pranuar megjithatë se do të preferonte t’i kishte të gjithë lojtarët pranë fushës për të ndier dhe ndarë energjinë e ndeshjes. Tekniku ka kujtuar se, gjatë Botërorit të Klubeve të zhvilluar në Shtetet e Bashkuara, skuadra si Borussia Dortmund dhe Bayern Munich kishin përdorur tashmë zgjidhje të ngjashme me temperatura mbi 30 gradë.
Edhe disa protagonistë të turneut të fundit kanë treguar vështirësinë e të luajturit në kushte ekstreme: Marcos Llorente i Atletico Madrid, pas një ndeshjeje të luajtur me gati 40 gradë dhe lagështi shumë të lartë, ka folur për dhimbje në këmbë dhe vështirësi madje edhe në lëvizjet më të thjeshta.
Tuchel e di mirë se klima do të ndikojë në mënyrë të pashmangshme lojën: “Me 45 gradë nuk mund të mbash të njëjtin ritëm si me 20. Do të ndryshojë intensiteti, vrapimet dhe planet e ndeshjes”. Për këtë arsye, ka shtuar ai, stafi po studion sisteme ftohjeje dhe protokolle specifike për ta përgatitur sa më mirë kombëtaren angleze për këtë event veror.
