Nevoja për një “fund dinjitoz” të luftës u nënvizua nga Presidenti ukrainas Volodymyr Zelensky gjatë një konference për shtyp me Emmanuel Macron në Paris të hënën, me presidentin francez që përsëriti se asnjë diskutim mbi garancitë e sigurisë nuk mund të zhvillohet pa ukrainasit dhe evropianët.
Zelensky theksoi se qeveria e tij po bën çdo përpjekje për të arritur një fund të luftës , duke vënë në dukje se kjo duhet të bëhet “me dinjitet”. Siç vuri në dukje ai, vendi i tij ka nevojë për “garanci të forta sigurie” për të siguruar pavarësinë e tij.
"Rusia duhet ta ndalojë luftën që e nisi vetë. Është lufta e saj dhe duhet ta përfundojë", tha ai. Në të njëjtën kohë, ai theksoi se thelbi i qëndrimeve ukrainase mbetet i pandryshuar: "të ruhet pavarësia e Ukrainës".
Nga ana e tij, presidenti francez foli për një moment kyç "që mund të jetë vendimtar" për të ardhmen e paqes në Ukrainë dhe sigurinë në Evropë. Macron paralajmëroi se diskutimet mbi garancitë e ardhshme të sigurisë "nuk mund të mbahen pa ukrainasit dhe pa evropianët".
"Sot nuk ka një plan paqeje të finalizuar", shtoi Macron, duke sqaruar: Për çështjen e territoreve, ai mund të finalizohet vetëm nga Presidenti Zelensky.
“Plani po përmirësohet”, shtoi presidenti ukrainas, për të cilin “çështja territoriale është më e vështira”.
Presidenti francez përsëriti mbështetjen e Francës për Ukrainën dhe shprehu ngushëllimet e tij pas sulmeve të fundit ruse në qytetet ukrainase.
“Në momentin që po flasim për paqen, Rusia vazhdon të vrasë dhe të shkatërrojë”, tha ai dhe shtoi se ky qëndrim është “një fyerje ndaj drejtësisë dhe një pengesë për paqen”, duke theksuar se “Rusia nuk ka dhënë asnjë sinjal se po kërkon një zgjidhje paqësore”.
