Simon Cowell është rikthyer tek momenti i dhimbshëm kur mori lajmin për vdekjen e Liam Payne, ish-anëtarit të One Direction.
Në një intervistë për The New York Times, producenti 66-vjeçar tregon se lajmi e goditi si rrufe:
“Dikush që punon me mua hyri në dhomë. E pashë nga fytyra që ishte e shqetësuar. Më tha: ‘Ulu’. Dhe pastaj ma tha… Ishte një ‘wow’ që të lë pa fjalë,” u shpreh ai.
Cowell madje e krahasoi tronditjen me dhimbjen që ndjeu kur humbi të atin në vitin 1999:
“Është shumë e vështirë ta përshkruash. Thjesht shok. Nuk mendon më qartë.”
I prekur thellë nga tragjedia, Cowell tha se instinkti i parë ishte të kontaktonte prindërit e Payne:
“Si prind, imagjinoj se çfarë kanë ndjerë. I njihja dhe doja t’u thosha sa keq më vinte. Ishte thjesht e tmerrshme.”
Cowell kujtoi se e kishte takuar Liam një vit para vdekjes:
“Hyri në dhomë dhe dukej fantastik. Më tha se po kujdesej për veten, shkonte në palestër. Folëm për djalin e tij, për jetën… thjesht si miq.”
Ai tha se pikërisht ky takim e bëri lajmin edhe më të pabesueshëm.
Në mes të spekulimeve online se presioni i One Direction mund të ketë ndikuar në jetën e Payne, Simon u shpreh:
“Ideja që je përgjegjës për dikë 10 vite pasi e ke nënshkruar? Kjo është torturë. Prindërit e Liam më kanë thënë se ai ishte krenar për gjithçka që arriti.”
Pas vdekjes së Payne, burime të afërta me grupin thanë se tragjedia i ka afruar ish-anëtarët, të cilët aktualisht po mbajnë lidhje më të ngushta se vitet e fundit.
