Ethan Hawke ka folur hapur për sfidat e divorcit të tij të shumëpërfolur me Uma Thurman, ndarje që u bë publike në vitin 2005.
Në një intervistë për Los Angeles Times, aktori 55-vjeçar u shpreh se, pavarësisht presionit të medias, ajo që e bën divorcin të vështirë është e njëjta gjë që prek të gjithë njerëzit.
“Syri i publikut është si benzinë në zjarr, por ajo që e bën divorcin të vështirë janë familjarët – si t’i ndihmosh fëmijët ta përballojnë,” tha ai. “Jam shumë ziliqar ndaj atyre që ndahen në mënyrë miqësore.”
Megjithatë, Hawke theksoi se nuk mund të fliste më gjatë për divorcin, pasi u kishte premtuar fëmijëve të tij se nuk do ta diskutonte publikisht.
“E kam premtuar shumë herë se nuk do të flas për këtë në publik,” u shpreh ai, duke iu referuar fëmijëve që ka me Thurman, Mayan dhe Levonin.
Hawke tregoi se pas ndarjes ishte i bindur se nuk do të krijonte më familje, por jeta kishte plane të tjera.
Ai u lidh me partneren e tij të tanishme, Ryan Shawhughes, me të cilën sot ka dy vajza: Clementine, 17 vjeç, dhe Indiana, 14 vjeç.
Në një intervistë të mëparshme për GQ, Hawke e përshkroi mbulimin mediatik të ndarjes me Thurman si “poshtërues”, duke shtuar se lidhja e tyre kishte nisur gjatë xhirimeve të filmit “Gattaca” (1997), në një atmosferë që ai e përshkroi si “magji kinematografike”.
Ai shpjegoi se emocioni i krijuar gjatë punës në film shpesh mund të ngatërrohet me romancë:
“Është si kampi veror – i rrit temperaturat, të duket rrezikshëm dhe emocionues, por nuk ka lidhje me realitetin e përditshëm.”
Thurman kërkoi divorcin në vitin 2005, mes raportimeve se Hawke kishte nisur një lidhje me Shawhughes, e cila më herët kishte punuar si dado e tyre.
Ai u martua me Shawhughes në vitin 2008, ndërsa Thurman vazhdoi me financierin Arpad Busson, me të cilin ka një vajzë, Lunën.
