Muzeu Metropolitan i Artit në New York ka njoftuar temën e Met Gala-s 2026: “Costume Art”, një ekspozitë që do të tregojë se si trupi dhe moda kanë ndikuar njëri-tjetrin gjatë historisë.
Ekspozita do të sjellë 200 veshje dhe aksesorë të vendosur përkrah 200 veprave arti nga periudha të ndryshme — nga prehistoria deri në ditët e sotme. Gala e vitit 2026 do të hapë për herë të parë galeritë e reja Condé M. Nast, një hapësirë prej 12,000 metrash katrorë brenda muzeut, e cila më parë ka qenë zonë shitjesh.
Kuratori Andrew Bolton tha se ekspozita nuk do të fokusohet thjesht tek pamja e modës, por tek materialet dhe marrëdhënia direkte mes trupit dhe veshjes. Një shembull i kësaj qasjeje është një grafik i vitit 1504 që paraqet Adamin dhe Evën, i vendosur pranë kostumeve moderne prej spandex të frymëzuara nga i njëjti motiv.
Në njoftim u prezantuan edhe disa veshje që do të jenë pjesë e ekspozitës, si fustani “Pregnancy” i Georgina Godley dhe një veshje skulpturore e Comme des Garçons.
Jeff Bezos dhe bashkëshortja e tij Lauren Sánchez do të jenë sponsorët kryesorë të eventit. Çifti mungoi në galanë e vitit 2025 për shkak të përgatitjeve të dasmës së tyre në Venecia.
Met Gala e këtij viti, me temën “Superfine: Tailoring Black Style”, mblodhi një rekord prej 31 milionë dollarësh për Costume Institute.
Ekspozita e vitit 2026 hapet më 10 maj dhe do të zgjasë deri më 10 janar 2027.
