Zëvendësja e Ramës sillet sikur asgjë s'ka ndodhur. Ndonëse është e pandehur nga SPAK për aferën e tunelit të Llogarasë, Belinda Balluku vijon inspektimet si normalisht. Deri më tani duket se Edi Rama, ky "dashnor" i reformës në drejtësi dhe institucioneve të pavarura, s'ka në plan ta largojë nga qeveria. Ose jemi në kushtet kur mbrojtja ndaj saj është vetëm e përkohshme. Mbetet për t'u parë.
Sot Balluku ishte në hidrocentralin e Komanit. Ajo tha se të gjitha strukturat janë në gatishmëri për monitorimin dhe menaxhimin e situatës, ku si pasojë e reshjeve intensive janë shtuar ndjeshëm prurjet në kaskadë.
Balluku u shpreh se nuk pritet të hapen portat e hidrocentralit. Ajo theksoi se KESH-i ka punuar që prej datës 11 nëntor për të liruar volumet dhe se në liqenin e Komanit, atë të Vaut të Dejës dhe Fierzës ka ende mundësi për të akumuluar.
“Ne jemi të përgatitur. Çfarë është e rëndësishme dhe çfarë duhet t’u themi të gjithë njerëzve, nuk parashikohet hapja e portave sepse ky është problemi kryesor dhe shpeshherë abuzohet edhe me lajmin. Në rastin e përmbytjes së Nënshkodrës flitet për hapjen e portave. Ne po e bëjmë me dije që i kemi kapacitetet dhe volumet pasi kemi punuar nga data 11 nëntor për të liruar volume. Kemi rreth 4.5 metra mundësi për të akumuluar në liqenin e Vaut të Dejës dhe rreth 7 metra në liqenin e Komanit. Ndërkohë që të pesë agregatet e Vaut të Dejës janë në funksion dhe katër agregatet e Komanit janë në funksion. Fierza qëndron e mbyllur për të akumuluar sa më shumë dhe për të rritur nivelin e liqenit”, tha Balluku.
