Aktorja e njohur Blake Lively ka arritur një fitore të rëndësishme në gjykatë ndaj firmës së marrëdhënieve me publikun që lidhet me aktorin dhe regjisorin Justin Baldoni.
Një gjykatës në Teksas vendosi se gjykata e shtetit nuk kishte juridiksion për të trajtuar padinë për shpifje të ngritur kundër aktores, sipas dokumenteve të siguruara nga Page Six.
Eksperti i PR-it, Jed Wallace, pronar i kompanisë Street Relations Inc., kishte paditur Lively-n në shkurt 2025, duke pretenduar se ajo i kishte shkaktuar dëme serioze. Nuk dihet ende nëse Wallace do ta rifusë çështjen në ndonjë shtet tjetër.
Vendimi i fundit i gjykatës shënon një fitore për aktoren e filmit “It Ends With Us”, e cila në dhjetor 2024 kishte ngritur një padi kundër Justin Baldoni-t, duke e akuzuar për ngacmim seksual dhe një fushatë shpifjeje online kundër saj.
Sipas padisë së saj, ekipi i Baldoni-t thuhet se kishte punësuar Wallace dhe kompaninë e tij për të krijuar një “ushtri dixhitale” që do të dëmtonte imazhin e saj në platforma si Reddit.
Në kundërpërgjigje, Wallace ngriti një padi për shpifje kundër Lively-t, duke pretenduar se akuzat e saj i kishin shkaktuar “miliona dollarë dëme” dhe humbje të tjera të mëdha për kompaninë e tij.
Megjithatë, gjykatësi Lewis Liman vendosi që Wallace nuk kishte lidhje të mjaftueshme me Nju Jorkun për t’u paditur atje, pasi ai jeton dhe punon në Austin, Teksas — duke e hedhur poshtë padinë për arsye juridiksioni.
Avokati i Baldoni-t, Bryan Freedman, tha pas vendimit:
“Jemi mirënjohës që gjykata e bëri të qartë se akuzat ndaj z. Wallace nuk kishin vend në këtë gjykatë. Të gjitha pretendimet kundër tij janë hedhur poshtë.”
Ndërkohë, Lively vijon padinë për ngacmim seksual kundër Baldoni-t, ndërsa ky i fundit më parë kishte ngritur një padi 400 milionë dollarëshe për shpifje ndaj Lively-t, bashkëshortit të saj Ryan Reynolds dhe publicistes Leslie Sloane, e cila gjithashtu u hodh poshtë nga gjykata në qershor.
Çështja e Lively kundër Baldoni-t pritet të shkojë në gjyq në mars 2026.
