Elton John ka pasur një shpërthim nervash në prapaskenë gjatë ceremonisë së “Rock & Roll Hall of Fame”, që u mbajt të shtunën në mbrëmje në Peacock Theater.
Ngjarja ishte vonuar më shumë seç duhej, gjë që e acaroi “Rocket Man”-in, i cili nisi të bërtiste ndaj organizatorëve:
“Çfarë dreqin po bëni? Askush nuk di çfarë po bën!” – mësohet të ketë thënë Elton me nerva.
Burime për median treguan se artisti britanik ishte i shqetësuar se vonesa mund t’i prishte planet e udhëtimit.
“Avioni im po më pret!”, mësohet ta ketë thënë ai me ton të lartë pak para se të ngjitej në skenë për të nderuar Brian Wilson, bashkëthemeluesin legjendar të The Beach Boys që u nda nga jeta në qershor.
Megjithë tensionin, Elton John doli në skenë pa problem, edhe pse këtë herë pa pianon e tij të famshme.
Ai emocionoi publikun me një interpretim të këngës “God Only Knows”, duke e cilësuar Wilson si “idhullin” e tij më të madh në muzikë.
“Ai ishte njeriu që më frymëzoi më shumë nga të gjithë kur bëhej fjalë për të shkruar këngë në piano,” – tha Elton para turmës.
Ky nuk është shpërthimi i parë i Eltonit. Fansat kujtojnë edhe incidentin e famshëm të vitit 1999 gjatë provave me Tina Turner për “VH1 Divas Live”. Turner kishte treguar më vonë se “gabimi” i saj ishte që tentoi t’i tregonte Eltonit si të luante në piano. “Ai shpërtheu dhe iku me nerva nga skena,” kishte rrëfyer ajo, edhe pse më pas John i kërkoi falje.
