Aktorja Sydney Sweeney ka reaguar publikisht pas performancës zhgënjyese të filmit të saj të ri, Christy, në arkë. Drama biografike, e bazuar në jetën e boksieres së njohur Christy Martin, grumbulloi vetëm 1.3 milionë dollarë në fundjavën e hapjes në mbi 2,000 kinema në SHBA, duke u renditur në vendin e 11-të në box office.
Megjithatë, ndryshe nga rezultatet financiare, filmi është pritur jashtëzakonisht mirë nga publiku, me 99% vlerësim pozitiv në Rotten Tomatoes.
“Jam thellësisht krenare për këtë film,” – shkroi Sweeney në Instagram, duke ndarë foto nga prapaskenat e xhirimeve. “Jam krenare që përfaqësoj dikë kaq të fortë dhe të qëndrueshme si Christy Martin. Ishte një nga nderet më të mëdha të jetës sime.”
Aktorja shtoi se Christy është më shumë sesa një film sportiv — është një histori e mbijetesës, guximit dhe shpresës për gratë që përballen me dhunë në familje.
“Nëse historia e Christy-t i ka dhënë qoftë edhe një gruaje forcën për të hedhur hapin e parë drejt sigurisë, atëherë kemi arritur qëllimin,” – shkroi ajo.
Filmi tregon rrugëtimin e Christy Martin nga karriera në ring deri te abuzimi që ajo pësoi nga bashkëshorti dhe trajneri i saj, James Martin (i luajtur nga Ben Foster).
Sweeney e përshkroi këtë projekt si “më të ndikuarin e jetës sime”, duke shtuar:
“Ne nuk bëjmë art për shifra, e bëjmë për ndikim. Ky film është për çdo grua që ka mbijetuar dhe tani po rifiton fuqinë e saj.”
Aktorja përmendi gjithashtu se përmes fushatave të filmit janë ngritur fondet dhe ndërgjegjësimi për viktimat e dhunës në familje.
