Një avion ushtarak turk C-130 është rrëzuar sot në territorin e Gjeorgjisë, duke shkaktuar një tragjedi të rëndë për forcat e armatosura turke. Mësohet se 20 personat në bordin e aeroplanit kanë humbur jetën. Aeroplani ishte nisur nga Azerbajxhani dhe ishte drejtuar për në Turqi kur u rrëzua në një zonë malore pranë kufirit gjeorgjiano -azerbajxhanas, sipas një deklarate zyrtare nga Ministria Turke e Mbrojtjes.
Videoja e transmetuar nga mediat ka kapur momentin e rrëzimit të avionit, duke lënë pas tym të bardhë. Presidenti turk, Rexhep Tayyip Erdogan, tha se ishte thellësisht i trishtuar dhe shprehu ngushëllime për të vrarët në aksident. Në një bisedë telefonike me homologun e tij turk, edhe Presidenti i Azerbajxhanit, Ilham Aliyev, shprehu ngushëllimet e tij.
“Jemi thellësisht të trishtuar nga lajmi tragjik i humbjes së ushtarakëve në rrëzimin e një avioni transporti ushtarak të Forcave Ajrore Turke, i cili u ngrit nga Ganja dhe u rrëzua në territorin gjeorgjian. Në këtë moment pikëllimi, ndaj dhimbjen tuaj dhe, në emrin tim dhe të popullit të Azerbajxhanit, shpreh ngushëllimet e mia më të thella për ju, familjet dhe të dashurit e viktimave, si dhe popullin vëllazëror të Turqisë”, tha ai në mesazhin e tij.
Ministria e Brendshme e Gjeorgjisë tha se kontakti me radarin u humb disa minuta pasi avioni hyri në hapësirën ajrore të Gjeorgjisë dhe nuk u dërgua asnjë sinjal shqetësimi. Autoritetet nga të tre vendet kanë nisur një operacion të përbashkët kërkim-shpëtimi.
