8 muaj më parë, Mossos d'Esquadra (policia katalanase) kreu një operacion të quajtur “Trifásico” kundër një rrjeti kriminal shqiptar të dedikuar në kultivimin dhe trafikimin e marijuanës në Katalonjë. Operacioni policor çmontoi rrjetin dhe tashmë çështja i ka kaluar gjykatës.
Trupa gjykuese ka lëshuar një urdhër për të nisur gjyqin me procedurë të shkurtuar. Në terma praktikë, kjo do të thotë që çështja e mbyllur fazën e hetimit dhe gjyqtari beson se ka prova të mjaftueshme për të vazhduar shqyrtimin.
Janë 12 personat nën hetim që presin të dalin në gjyq. Midis tyre është një shtetas spanjoll, së bashku me anëtarët me origjinë shqiptare, të cilët përballen me akuza për pjesëmarrje në një grup kriminal, trafik marijuane, vjedhje të energjisë elektrike dhe posedim të paligjshëm të armëve.
Media spanjolle “Crónica Global” shkruan se kjo nuk është hera e parë që këta trafikantë droge përballeshin me policinë. Sipas nën-inspektorit Óscar Durán, kreu i Njësisë së Hetimit Territorial, shumica e anëtarëve të saj ishin arrestuar më herët dhe ndjekur penalisht në Katalonjë për vepra të ngjashme penale.
Në këtë rast, pra, risia nuk ishte vetë krimi, por niveli i profesionalizimit, aftësia për riaktivizim dhe shkalla industriale e “biznesit” të tyre.
Organizata përbëhej nga dy grupe të dallueshme, por të lidhura me njëra - tjetrën, të cilat kishin ngritur 3 plantacione të mëdha të kultivimit të kanabisit.
Të 3 fermat u gjetën të kishin lidhje të paligjshme me rrjetin elektrik, sisteme trefazore dhe makineri të teknologjisë së fundit me vlerë mijëra euro. Sasia e vjedhur nga sistemi i energjisë elektrike vetëm në këto tre ferma tejkalon 230 000 euro.
Udhëheqësi operativ i grupit, i njohur si “Arias Basurto”, duket se është qendra logjistike, tregtare dhe e kontabilitetit të rrjetit. Gjatë kontrollit të shtëpisë së tij u gjet edhe një bllok që përmbante shënime për të ardhurat, kostot, shpërndarjen dhe parashikime të korrjeve. Një regjistër i vërtetë kriminal.
Krahas tij punonin dy personat e tij të besuar, përgjegjës për sigurimin e automjeteve, blerjen e materialeve nga dyqanet e kultivimit dhe dyqanet e pajisjeve, transportimin e ushqimit dhe veglave te “kopshtarët” që punonin në depo dhe kontrollin e rotacionit të të korrave dhe prerjen e drogës.
Figura kyçe që i dha rrjetit një pamje legale ishte Ramón CC, i vetmi spanjoll midis 12 të hetuarve. Roli i tij ishte dhëna me qira e depove dhe shtëpive në emrin e tij ose nëpërmjet palëve të treta, duke vepruar si ndërlidhës midis dy grupeve dhe duke lehtësuar logjistikën e brendshme të rrjetit.
Gjatë kontrollit të shtëpisë së tij u sekuestruan gjithashtu 3 pistoleta dhe municione. ©LAPSI.al
