Donald Trump, i cili priti në Shtëpinë e Bardhë kryeministrin Viktor Orbán, deklaroi se po “shqyrton” mundësinë e përjashtimit të Hungarisë nga sanksionet ndaj naftës dhe gazit rus.
“Është shumë e vështirë për zotin Orbán të sigurojë naftë dhe gaz nga rajone të tjera,” tha Trump. Ai shtoi se hungarezët “nuk kanë avantazhin e detit. Është një vend i mrekullueshëm, një vend i madh, por nuk kanë det. Nuk kanë portet e tyre. Dhe kështu ata përballen me një problem të vështirë.”
Në një pjesë tjetër të deklaratave për gazetarët, Trump u shfaq mbështetës i ligjeve të ashpra të Hungarisë për imigracionin.
“Mendoj se duhet të respektojnë Hungarinë dhe këtë udhëheqës shumë seriozisht, sepse ai ka të drejtë në çështjen e imigracionit,” tha Trump, duke iu referuar Bashkimit Evropian dhe mosmarrëveshjeve të tij me politikën e Orbán.
Ai shtoi edhe një koment: “Shikoni çfarë ka ndodhur në Evropë me imigracionin, njerëzit mbushin Evropën, kudo, dhe kjo po i bën dëm.”
Në fund, lidhur me takimin me Vladimir Putin që do të zhvillohej në Budapest, Trump tha se do të donte që ai të mbahej në kryeqytetin hungarez, por nuk sheh ndonjë arsye për ta realizuar tani.
