Aktorja e njohur e serialit Euphoria, Sydney Sweeney, ka thyer heshtjen pas polemikave që shpërthyen rreth reklamës së saj për markën American Eagle, e cila u akuzua nga disa fansa si “propagandë naziste”.
Në një intervistë për revistën GQ, Sweeney u pyet nëse ishte e befasuar nga reagimet e forta që mori fushata, por ajo e mori me sportivitet: “Bëra thjesht një reklamë për xhinse. Po, reagimi më befasoi, por... unë i dua xhinset!” – u shpreh ajo me një buzëqeshje.
Aktorja theksoi se pranoi pjesëmarrjen në fushatë sepse është një adhuruese e madhe e xhinseve. “Gjithçka që vesh janë xhinse. Jam çdo ditë me xhinse dhe bluzë të thjeshtë”, shtoi ajo.
Gjatë intervistës, Sweeney foli edhe për reagimin e ish-presidentit Donald Trump, i cili e kishte përgëzuar publikisht për spotin, duke e quajtur “fantastik”. “Ishte diçka surreale,” tha aktorja, duke shtuar se nuk e kishte menduar fare nga ajo këndvështrim.
Sweeney pohoi gjithashtu se nuk u ndikua nga kritikat në rrjete sociale, pasi gjatë asaj kohe ishte e zënë me xhirimet e sezonit të fundit të Euphoria. “Punoj nga 16 orë në ditë dhe e lë telefonin mënjanë. Nuk kam parë shumë nga ajo që po ndodhte,” tregoi ajo.
Reklama e famshme kishte shkaktuar debat në rrjete sociale për shkak të një loje fjalësh mes “genes” (gjenet) dhe “jeans” (xhinset), teksa Sweeney, me flokë të verdhë dhe sy blu, fliste për trashëgiminë gjenetike dhe përfundonte me frazën “My jeans are blue”.
Pas kritikave, që erdhën edhe nga figura si Doja Cat dhe Lizzo, Trump reagoi duke e lavdëruar aktoren dhe duke thënë se ajo ishte “fantastike” — ndërsa mediat raportuan se Sweeney është një republikane e regjistruar.
