Pas raundit të dytë të zgjedhjeve lokale, lideri i BDI-së Ali Ahmeti, deklaroi se koalicioni AKI ka fituar votën popullore dhe komunale me mbi 23 000 vota diferencë, por nuk mundën të marrin kryetarët e komunave.
“Rezultatet janë tashmë të njohura. Ne kemi fituar shumicën e votës popullore në mbarë vendin, apo më mitrë të thuhet të votës kombëtare në këto zgjedhje, me mbi 23 mijë vota më shumë, por nuk kemi arritur të fitojmë garën për kryetar komunash.
Ky është një mesazh që ne e pranojmë. Qytetarët kërkojnë që të rinovojmë mënyrën se si i përfaqësojmë këto vlera në teren. Bashkimet artificiale mund të na sjellin edhe pasoja në të ardhmen. Këto u pasuan me keqpërdorime të resurseve shtetërore dhe shantazhe e presione finaciare mbi votuesit”, - tha Ahmeti.
Ai shtoi se humbjet e disa posteve në nivel komunal do të shërbejnë si një thirrje për analizë të thelluar, për rinovimin e strategjive dhe korrigjimin e çdo mangësie për të ofruar më shumë dhe më mirë për qytetarët.
“Ne do të bëjmë një analizë të thelluar, do të rinovojmë rradhët tona dhe strategjitë tona dhe do të korrigjojmë çdo mangësi për të ofruar më shumë dhe më mirë për qytetarët”, theksoi Ahmeti.
Ahmeti nënvizoi se partia do të përqendrohet në forcimin e strukturave të saj dhe përmirësimin e menaxhimit të politikave lokale, duke synuar një përfaqësim më efektiv dhe shërbime më të mira për komunitetet në të gjithë vendin. /LAPSI.al
