Një gjykatë në Bolonja ka miratuar ekstradimin e një ukrainasi në Gjermani. Ai dyshohet se ka organizuar sulmet ndaj tubacioneve të gazit Nord Stream.
Në mosmarrëveshjen ligjore mbi ekstradimin e një sabotatori të dyshuar për sulmin ndaj gazsjellësit Nord Stream 2 drejt Gjermanisë, një gjykatë në Itali ka vendosur tanimë për ekstradimin e ukrainasit, sipas avokatit të të akuzuarit ukrainas. Megjithatë, çështja mund të dëgjohet përsëri. Pas vendimit të gjykatës së Bolonjës, avokati Nicola Canestrini njoftoi se do të paraqesë një ankesë në Gjykatën e Kasacionit në Romë. Kjo e fundit e kishte kthyer çështjen përsëri në gjykatën e Bolonjës një herë më parë.
I dyshuari u arrestua në pushime
Serhij K. konsiderohet si një nga organizatorët e dyshuar të sulmeve në tubacionet e gazit në shtator 2022. Zyra e Prokurorisë Federale të Gjermanisë e akuzon atë për shkaktimin në bashkëpunim të shpërthimi në ish-projektin prestigjioz gjermano-rus dhe për sabotim. Prandaj, ai do të gjykohet në Gjermani. Prokurorit Federal ka kërkuar ekstradim për këtë qëllim. K. u arrestua në verë në bazë të një urdhër-arresti evropian në bregdetin italian të Adriatikut, ku po kalonte pushimet me gruan dhe fëmijët e tij. Që nga arrestimi i tij, ukrainasi është mbajtur në një burg të sigurisë së lartë.
Gjykata në Bolonja kishte miratuar fillimisht ekstradimin në shtator. Por avokati i ukrainasit e çoi çështjen para gjykatës më të lartë të Italisë. Në mesin e tetorit, gjykata e ndaloi papritur ekstradimin për shkak të parregullsive procedurale dhe e ktheu çështjen përsëri në Bolonja. Gjykata duhej të merrte një vendim të ri.
Shpërthimet ndaj tubacioneve të gazit Nord Stream tërhoqën vëmendjen mbarëbotërore tre vjet më parë. Gjashtë muaj pas fillimit të luftës së agresionit të Rusisë kundër Ukrainës, shpërthimet dëmtuan dy tubacionet aq rëndë sa gazi nuk mund të transportohej më përmes tyre. Shpërthimet u regjistruan pranë ishullit danez Bornholm./ DW
