Familja e Britney Spears është thellësisht e shqetësuar për këngëtaren, pasi ajo u pa duke drejtuar makinën në mënyrë të rrezikshme pas një nate jashtë me një shoqe, në Thousand Oaks, Kaliforni.
Sipas Daily Mail, familja është “e tmerruar” se Spears po humb kontrollin, duke krahasuar sjelljen e saj të fundit me periudhën e errët të vitit 2007 – kur ajo përjetoi një krizë nervore, rruajti kokën dhe humbi kujdestarinë e djemve të saj me Kevin Federline.
“Ka shumë shqetësim. Të gjithë duan më të mirën për të, por ajo po bën zgjedhje të këqija,” – tha një burim për mediat. – “Është e frikshme. Po diskutohet si mund ta mbrojmë nga vetja.”
Burime të afërta me familjen madje kanë sugjeruar se Britney mund të rikthehet nën kujdestari, ndonëse kujdestarua e saj 13-vjeçare, që mbahej pjesërisht nga babai Jamie Spears, përfundoi në vitin 2021 pas presionit publik nga lëvizja #FreeBritney.
“Herën e fundit që Jamie ndërhyri, e bënë armikun publik nr. 1,” – tha një burim tjetër. – “U tha se donte vetëm paratë e saj, gjë që nuk ishte e vërtetë. Tani të gjithë pyesin: a duhet dikush të ndërhyjë sërish?”
Spears është sërish në qendër të mediave edhe për shkak të librit autobiografik të ish-bashkëshortit Kevin Federline, “You Thought You Knew”, ku ai bën akuza të rënda ndaj saj — mes tyre, përdorim droge gjatë periudhës së mëmësisë dhe deklarata tronditëse për fëmijët e tyre.
Një zëdhënës i Spears e ka quajtur librin “përpjekje për të përfituar nga emri i saj”, duke shtuar se këngëtarja kujdeset vetëm për mirëqenien e djemve të saj.
Kohët e fundit, Spears ka bërë edhe deklarata shqetësuese në rrjetet sociale, duke pohuar se ka pësuar “dëmtim në tru” nga mënyra si ishte kontrolluar për vite me radhë gjatë periudhës së kujdestarisë.
“Më janë prerë krahët, më është marrë liria… por jam e bekuar që jam ende gjallë,” – ka shkruar ajo.
