Lily Allen ka tronditur publikun me albumin e saj të ri, “West End Girl”, ku me tekste plot nënkuptime, duket se akuzon ish-bashkëshortin e saj, aktorin e “Stranger Things”, David Harbour, për tradhti dhe varësi nga seksi.
Albumi me 14 këngë, i publikuar këtë të premte, përshkruan në mënyrë të qartë fundin e martesës së tyre dhe momentet e dhimbshme të ndarjes, megjithëse Allen nuk e përmend kurrë me emër Harbour-in.
Në këngën “Dallas Major”, ajo flet për një marrëdhënie “të hapur” që mori fund pasi partneri “shkoi më larg seç duhej”. Ndërsa në “P–sy Palace”, artistja rrëfen se ka zbuluar një “jetë të dyfishtë”, duke përmendur se gjeti “lodra seksuale, lubrifikantë dhe qindra prezervativë” në shtëpi.
Në një tjetër këngë, “4chan Stan”, Allen përmend një faturë nga Bergdorf Goodman për një çantë të shtrenjtë që partneri i kishte blerë dikujt tjetër:
“E çove dikë për shopping në maj të 2024-ës… i bleve një çantë, që s’ishte e lirë / unë isha në Londër, ndoshta po flija.”
Në këngët “Tennis” dhe “Sleepwalking”, këngëtarja i referohet mesazheve që ka gjetur në telefonin e bashkëshortit me një vajzë të quajtur Madeline, dhe pranon se mes tyre “nuk kishte më asnjë romancë që prej dasmës.”
Në një intervistë për Perfect Magazine, Allen pranoi se projekti është frymëzuar nga përjetime reale:
“Ka disa gjëra që ndodhën në jetën time të vërtetë dhe janë reflektuar në këtë album. Është e dhimbshme kur dy njerëz që kanë qenë bashkë, nuk janë më.”
Lajmi për ndarjen e çiftit doli në muajin shkurt, ndërsa Allen paraqiti zyrtarisht kërkesën për divorc muajin e kaluar.
