Kevin Federline ka bërë deklarata tronditëse për marrëdhënien e djemve me Britney Spears, duke thënë se ata janë “të shqetësuar” dhe “të frikësuar” për nënën e tyre të famshme.
Në një intervistë për Piers Morgan në emisionin “Uncensored”, Federline rrëfeu se njëri prej djemve, Sean Preston (20 vjeç), ka vendosur të mos e takojë më nënën pas një vizite të fundit.
“Britney e pa njërin prej djemve një ditë këtë vit, dhe ai vendosi të mos kthehej më pas asaj që pa,” – tha Federline.
Ndërsa djali tjetër, Jayden (19 vjeç), sipas tij e kishte vizituar nënën disa herë gjatë vitit, por edhe ai ka ndalur kontaktet “për shkak të situatës”.
“Ata janë të tmerruar dhe të shqetësuar për nënën e tyre. Nuk dinë si ta ndihmojnë, sepse kjo u ka kushtuar shumë,” – shtoi ish-balerini.
Federline nuk pranoi të tregonte se çfarë kishin parë djemtë, duke e lënë këtë “si histori që u takon atyre ta tregojnë”. Megjithatë, ai zbuloi se njëri prej tyre e kishte telefonuar në panik duke i thënë: “Kam frikë se mami do të vdesë.”
Deklaratat e tij vijnë në të njëjtën javë kur Federline publikoi librin autobiografik “You Thought You Knew”, ku përfshihen një sërë akuzash ndaj Spears, mes tyre se ajo kishte përdorur drogë gjatë kohës që ushqente me gji, kishte qëlluar njërin prej djemve dhe madje kishte qëndruar pranë tyre me “thikë në dorë” ndërsa flinin.
Një përfaqësues i Spears e ka cilësuar librin “një përpjekje për përfitim financiar” pas përfundimit të pagesës së alimentacionit për Federline.
Në reagimet e saj në platformën X (ish-Twitter), Spears shkroi: “Gaslighting i vazhdueshëm nga ish-bashkëshorti është tepër i dhimbshëm dhe rraskapitës. Jam lutur gjithmonë për të pasur një jetë me djemtë e mi.”
Ajo konfirmoi gjithashtu se kontaktet me djemtë janë pothuajse të ndërprera: njëri prej tyre e ka parë vetëm 45 minuta gjatë këtij viti, ndërsa tjetri katër herë në pesë vitet e fundit.
Spears më vonë e akuzoi publikisht Federline për “sulm” ndaj saj përmes librit: “Pse është kaq i zemëruar? Dhe ajo që më frikëson është se ai duket bindës. Është e pabesueshme.”
