Brigitte Bardot ka vendosur të sqarojë publikisht gjithçka pas përhapjes së lajmeve të rreme për vdekjen e saj.
Në një postim në platformën X (ish-Twitter) të mërkurën, më 22 tetor, 91-vjeçarja shkroi në frëngjisht:
“Nuk e di kush është idioti që shpiku këtë ‘fake news’ për zhdukjen time, por dijeni që jam mirë dhe s’kam ndërmend të largohem ende nga skena. Fjalë për të mençurit.”
Deklarata e saj erdhi pasi influenceri 27-vjeçar Aqababe (emri i vërtetë Aniss Zitouni) kishte publikuar – e më pas fshirë – një postim ku pretendonte se Bardot kishte ndërruar jetë. Sipas tij, “arkivoli i saj ishte porositur në Saint-Paul-de-Jarrat, dhe Franca kishte humbur një ikonë të pavdekshme.”
Pas reagimit të Bardot, Aqababe qëndroi në deklaratën e tij fillestare, duke pretenduar se nuk është vetë aktorja ajo që menaxhon llogarinë e saj në X.
“E fshiva postimin për vdekjen e Brigitte Bardot. Nuk është ajo që menaxhon Twitter-in e saj. Do ta shihni kur AFP ta konfirmojë zyrtarisht,” shkroi ai.
Ndërkohë, gazetat franceze kanë raportuar se aktorja ishte shtruar në spital në Toulon për afro tre javë, pas një ndërhyrjeje kirurgjikale që lidhej me “një sëmundje serioze”.
Më 17 tetor, zyra e Bardot-s i tha agjencisë AFP, përmes Reuters, se operacioni kishte kaluar me sukses dhe se ajo po pushonte në shtëpi. Bardot gjithashtu falënderoi stafin dhe ekipin mjekësor të Spitalit Privat Saint-Jean në Toulon për kujdesin e treguar.
