Victoria Beckham ka reaguar për herë të parë ndaj akuzave të rikthyera në vëmendje nga Rebecca Loos, e cila pretendon se ka pasur një aferë me David Beckham.
Gjatë një interviste në podcastin “Call Her Daddy”, ish-anëtarja e “Spice Girls” foli hapur për sfidat në martesën e saj 26-vjeçare me ish-futbollistin.
“Jemi përballur me shumë spekulime gjatë gjithë këtyre viteve,” tha Victoria, duke shtuar: “Sapo festuam 26-vjetorin tonë të martesës… dhe shumë njerëz dikur thoshin se nuk do funksiononte. Por ja ku jemi! Gjithmonë kemi qëndruar bashkë dhe kemi përballuar çdo stuhi si çift.”
Në vitin 2004, Rebecca Loos deklaroi se kishte pasur një aferë katërmujore me David Beckham, ndërkohë që Victoria ndodhej jashtë vendit. David i ka mohuar gjithmonë këto akuza, por Loos i ka risjellë në vëmendje publikisht vitin e kaluar, duke insistuar se thotë të vërtetën.
Në dokumentarin “Beckham” në Netflix, David rrëfeu se kjo periudhë ishte jashtëzakonisht e vështirë për të dhe për martesën e tyre. Victoria e përshkroi si “kohën më të vështirë të jetës” së saj dhe pranoi se ndjeu zemërim ndaj bashkëshortit.
“Ishte sikur gjithë bota ishte kundër nesh… dhe për një moment, ishim kundër njëri-tjetrit,” tha ajo në dokumentar.
Gjatë intervistës me Alex Cooper, Victoria tregoi gjithashtu se për vite të tëra ka vuajtur nga një çrregullim ushqimi, të cilin e ka mbajtur të fshehtë madje edhe nga David.
Ajo foli edhe për marrëdhëniet familjare, përfshirë tensionet e raportuara mes saj, djalit të madh Brooklyn Beckham dhe nuses së tij, Nicola Peltz. Megjithatë, ajo theksoi se familja mbetet prioritet dhe se janë të gjithë të lidhur ngushtë.
Pas daljes së dokumentarit, Rebecca Loos u shfaq në një intervistë për “60 Minutes Australia” duke deklaruar se nuk ka gënjyer kurrë dhe nuk ka ekzagjeruar asgjë.
“Ishte një akt guximi nga ana ime. U përballa me çiftin më të fuqishëm të medias – me të gjithë paratë për PR dhe avokatët më të mirë,” tha ajo. “Unë kisha vetëm të vërtetën në krahun tim.”
