Mikel Oyarzabal i Real Sociedad nuk u besonte syve të tij: goli i barazimit që shënoi kundër Celtas iu anulua sepse sistemi gjysmë-automatik e kapi në pozicion jashtë loje. Çfarë ka të çuditshme? Asgjë. Sipas rregullores, vendimi duket i padiskutueshëm, duke gjykuar nga saktësia me të cilën teknologjia ndihmon arbitrat të zgjidhin situatat më të debatueshme. Megjithatë, çështja në këtë rast është tjetër dhe ngre pikëpyetje: a mund të konsiderohet një futbollist në pozicion jashtë loje vetëm sepse balli i tij ndodhej 1, maksimumi 2 centimetra përpara? Kjo është ajo që ndodhi gjatë ndeshjes së La Ligës.
Goli nuk u konfirmua për shkak të ballit në offside
Episodi që shkaktoi polemika ndodhi në fillim të pjesës së dytë, kur Real Sociedad arriti të marrë epërsinë ndaj vendasve, të pasaktë në fazën e daljes nga mbrojtja. Nga një prej këtyre gabimeve lindi aksioni që i mundësoi Ander Barrenetxea t’i pasonte Oyarzabal, i cili përfitoi nga rasti dhe mposhti Ionit Radun. Megjithatë, autori i golit nuk festoi: kishte një ndjesi të çuditshme, sepse ishte i vetëdijshëm se ishte nisur në kufirin e pozicionit jashtë loje; as fakti që arbitri e konsideroi golin të vlefshëm, duke treguar qendrën e fushës, nuk e qetësoi. Pas pak minutash erdhi “dusha e ftohtë”: rezultati 1-1 nuk mund të jepej.
Duke pasur parasysh se për të përcaktuar një pozicion jashtë loje merren në konsideratë vetëm pjesët e trupit me të cilat mund të shënohet gol (duart dhe krahët përjashtohen), imazhi i publikuar nga VAR-i (ai televiziv nuk kishte arritur të zhdukte të gjitha dyshimet) e shpjegoi arsyen pse goli nuk mund të konfirmohej: balli i lojtarit ndodhej paksa përtej vijës së vizatuar nga sistemi kompjuterik-dixhital në raport me mbrojtjen e Celta Vigo.
Precedenti Mbappé dhe reagimi i tij në rrjete sociale
Në këtë sezon ka ndodhur diçka shumë e ngjashme me atë që u pa në ndeshjen mes Celtas dhe Real Sociedad. Më 31 gusht, gjatë ndeshjes midis Real Madridit dhe Mallorcës, Mbappé pa t’i anulohej një gol për një situatë pothuajse identike.
Lexo më tej: VAR i hoqi një penallti e golin, Kapllanaj akuzon: “Vrapi kukull, skenar ndaj Bylis”
Madje, sipas komenteve të mediave në Spanjë, rasti i Oyarzabal mund të konsiderohet një lloj “rekordi” krahasuar me offside-in e francezit (ishte 1 cm me kokë përpara). Sulmuesi francez protestoi në fushë dhe më pas ndau zhgënjimin e tij në rrjetet sociale, duke publikuar një “story” ku tregonte imazhin e sistemit gjysmë-automatik të offside-it që e kishte penalizuar.
