“Cilin do të doja të më interpretonte në një film? Will Smith”, me këto fjalë Jannik Sinner i kishte habitur të gjithë. Gjatë një interviste në kuadër të Six Kings Slam, tenistit italian iu bë pyetja se cili aktor do të dëshironte të luante në një dokumentar mbi arritjet e tij sportive. Jannik, pa shumë dyshime, përmendi aktorin amerikan, duke shkaktuar edhe habinë e intervistuesit: “Nuk është aktori që prisja të thoshe.”
Fjalët e numrit një të tenisit italian u përhapën me shpejtësi në mbarë botën, duke arritur deri tek vetë Will Smith. Aktori nuk e la t’i shpëtonte rasti për t’iu përgjigjur ftesës së Sinner. Dhe e bëri me humorin që e karakterizon: në llogarinë e tij në Instagram u shfaq një story ku Smith mori një foto të Sinner me trofeun e Wimbledon dhe ia zëvendësoi fytyrën me të tijën. Rezultati: një fotomontazh po aq i këndshëm sa edhe mbresëlënës – Smith me një buzëqeshje të madhe, i veshur me kostumin e bardhë dhe me tufën e flokëve të kuq të Jannik. Aktori gjithashtu e etiketoi Sinner-in, duke shoqëruar imazhin me një mesazh: “Jam brenda.” Një hap i qartë drejt një bashkëpunimi të mundshëm kinematografik mes të dyve.
Lexo më tej: Mallkimi i Drake bie edhe mbi Sinner: Janik humb finalen, fluturojnë 300 mijë dollarë
Për Smith, kjo nuk do të ishte as hera e parë në një bio-pic me temë tenisin. Aktori ka interpretuar me sukses rolin e babait të motrave Williams në filmin “Una famiglia vincente – King Richard”, rol që i solli Oscarin si aktori më i mirë protagonist. Sinner është në duar të sigurta: për dokumentarin e tij, pavarësisht habisë së intervistuesit, ai ka zgjedhur aktorin e duhur.
