Diane Keaton, ka ndërruar jetë në moshën 79-vjeçare për shkak të pneumonisë. Lajmi është konfirmuar nga familja e saj për revistën People, të mërkurën, më 16 tetor.
“Familja Keaton është shumë mirënjohëse për mesazhet e jashtëzakonshme të dashurisë dhe mbështetjes që ka marrë këto ditë në emër të Dianës së tyre të dashur, e cila u nda nga jeta më 11 tetor si pasojë e pneumonisë,” thuhet në deklaratën zyrtare.
Një zëdhënës i familjes bëri të ditur se Keaton vdiq në Kaliforni. Sipas burimeve pranë saj, shëndeti i aktores kishte filluar të përkeqësohej në mënyrë të papritur gjatë muajve të fundit, gjë që e bëri vdekjen e saj edhe më tronditëse për të afërmit dhe miqtë.
Edhe pse Keaton kishte zgjedhur ta mbante betejënme shëndetin në privatësi, ajo bëri disa ndryshime të mëdha në jetën e saj kohët e fundit. Në mars, ajo e nxori në shitje shtëpinë e saj luksoze në Los Anxhelos për 29 milionë dollarë, pavarësisht se më herët kishte deklaruar se planifikonte të qëndronte aty përgjithmonë.
Një burim tjetër konfirmoi për People se aktorja nuk ishte parë duke shëtitur qenin e saj, si zakonisht, në lagjen Brentwood, gjatë muajve të fundit – një tjetër shenjë që tregonte përkeqësim të gjendjes së saj. Postimi i saj i fundit në Instagram daton në prill, ku ajo shfaqet e lumtur pranë qenit Reggie.
Diane Keaton, e njohur për rolet e saj të paharrueshme në filma si Annie Hall, The Godfather, dhe Something’s Gotta Give, nuk ishte martuar kurrë. Ajo ka pasur lidhje të njohura me aktorët Al Pacino, Woody Allen dhe Warren Beatty.
