Katy Perry dhe ish-kryeministri kanadez Justin Trudeau janë fotografuar në momente të afërta dhe romantike në një jaht luksoz pranë brigjeve të Santa Barbarës, sipas fotove të publikuara nga Daily Mail më 12 tetor.
Në pamjet e publikuara, Perry, 40 vjeç, dhe Trudeau, 53 vjeç, shihen duke u përqafuar dhe puthur, ndërsa në një prej fotove, Trudeau shihet duke e përqafuar nga pas këngëtaren, ndërsa shijonin lundrimin.
Thashethemet për një romancë mes Perry dhe Trudeau nisën në korrik, kur të dy u panë duke shëtitur një qen dhe më pas duke darkuar së bashku në restorantin "Le Violon" në Montreal.
Vetëm një muaj më parë, Perry kishte konfirmuar ndarjen nga i fejuari i saj, aktori Orlando Bloom, me të cilin ka një vajzë 5-vjeçare, Daisy Dove Bloom.
Nga ana tjetër, Trudeau ishte ndarë nga bashkëshortja e tij Sophie Grégoire në vitin 2023, pas 18 vitesh martesë dhe tre fëmijësh së bashku.
Vetëm dy ditë pas takimit të tyre në korrik, Trudeau u pa në koncertin e Perry-t në Montreal, pjesë e turneut të saj “Lifetimes Tour”, duke nxitur edhe më shumë spekulimet për një lidhje romantike.
Një burim nga Kanadaja tha për revistën PEOPLE në gusht se dyshja kishin krijuar një “lidhje të menjëhershme”, megjithëse ritmi i marrëdhënies është i ngadaltë për shkak të angazhimeve personale.
“Ata janë të interesuar për njëri-tjetrin, por do të duhet kohë për të parë se ku do të shkojë kjo lidhje,” – u shpreh burimi.
“Ajo është duke udhëtuar nëpër botë, ndërsa ai është ende duke kuptuar jetën e tij pas dorëheqjes si kryeministër. Por ka tërheqje mes tyre.”
Burimi gjithashtu theksoi se ndarja e detyrimeve prindërore mes ish-partnerëve të tyre u lejon më shumë fleksibilitet për të parë njëri-tjetrin, megjithëse distanca mbetet një sfidë.
