Victoria Beckham duket se ka vendosur të mos “luftojë më të njëjtën betejë” për marrëdhënien e tensionuar me djalin e saj të madh, Brooklyn, ndërsa spekulimet për një krisje të gjatë familjare po thellohen.
Sipas The Mirror, stilistja e njohur e modës ka vendosur të heqë dorë. Një burim pranë saj tha:
“Ka qenë një udhëtim emocional i vështirë, për shkak të marrëdhënies së thyer me Brooklyn. Por kjo gjithashtu e bëri të kuptojë se nuk mund të vazhdojë pafund të rikthehet tek dhimbja e kësaj situate. Tashmë është mjaft.”
Vendimi i saj vjen pas muajsh tensionesh mes 26-vjeçarit Brooklyn dhe familjes Beckham, që pas martesës së tij me aktoren Nicola Peltz.
Ai ka munguar në disa momente të rëndësishme familjare, përfshirë ditëlindjen e 50-të të David Beckham, si dhe ka ndaluar së ndjekuri vëllezërit e motrat në Instagram – duke shtuar thashethemet për një përçarje të thellë.
Një burim tha se dokumentari i ri i Victorias, ku përfshihet edhe një foto e Brooklyn si foshnjë, e ka ndihmuar të shohë situatën me një tjetër sy.
“E di që një ditë ai do t’i rikthehet, por nuk është momenti tani. Ky projekt i ka bërë të kuptojë sa e bekuar është me familjen që ka pranë saj,” – u shpreh i njëjti burim.
Megjithëse shpreson që marrëdhënia me djalin të rregullohet në të ardhmen, Victoria tashmë është e bindur se nuk mund të vazhdojë të “luftojë të njëjtën betejë”.
Ndërkohë, Brooklyn dhe bashkëshortja e tij Nicola kanë përballuar muaj të tërë spekulimesh për një ftohje me familjen Beckham, pasi nuk i ftuan ata as në ceremoninë e rinovimit të betimit në Nju Jork muajin e kaluar.
Së fundmi, Brooklyn foli për herë të parë mbi zërat e përçarjes, duke thënë për Daily Mail:
“Gjithmonë do të ketë njerëz që thonë gjëra negative, por unë kam një bashkëshorte shumë mbështetëse. Ne bëjmë jetën tonë, punojmë dhe jemi të lumtur.”
