Tom Holland ka zbuluar se është në gjendje të mirë shëndetësore pas një incidenti të ndodhur në setin e filmit të ri “Spider-Man: Brand New Day”.
Aktori 29-vjeçar postoi në Instagram një përditësim për gjendjen e tij shëndetësore të shtunën, duke falënderuar ndjekësit për mbështetjen dhe duke promovuar një gala bamirësie në Londër për organizatën e tij The Brothers Trust, që e drejton së bashku me tre vëllezërit e tij.
“Çfarë nate! Një tjetër sukses i madh,” shkroi Holland. “Më vjen keq që u detyrova të largohem herët, por ndjehem më mirë dhe jam në përmirësim.”
Sipas Daily Mail, Holland u rrëzua gjatë një skene aksioni të premten, më 19 shtator, në Leavesden Studios në Angli, duke pësuar një tronditje të lehtë në kokë.
Produksioni i filmit u ndal përkohësisht për t’i dhënë kohë aktorit të rikuperohej, por pritet të rifillojë xhirimet të hënën. Incidenti nuk pritet të ndikojë në datën e publikimit të filmit, e cila mbetet 31 korrik 2026.
Filmi ka nisur xhirimet që nga fillimi i gushtit në Glasgow, Skoci, ndërsa Holland është parë shpesh në skenat aksion me kostumin e famshëm të Spider-Man.
Në një video prapa skene të publikuar nga Sony gjatë ditës së parë të xhirimeve, Holland u shpreh:
“Është dita e parë, për herë të katërt në rolin e Spider-Man. Ndjehet ndryshe këtë herë. Dhe për herë të parë kemi pasur fansa në set që ditën e parë – është emocionuese.”
