Këngëtarja britanike Lola Young u rrëzua papritur në skenë teksa po performonte në një festival muzikor në New York City, duke tronditur publikun dhe ekipin organizues.
Ngjarja ndodhi të shtunën gjatë festivalit “All Things Go Music Festival”, i zhvilluar në Forest Hills Stadium, ndërsa Lola po këndonte hitin e saj “Conceited”.
Sipas revistës People, artistja u ndihmua menjëherë nga ekipi mjekësor, i cili e nxori nga skena nën brohoritjet mbështetëse të publikut. Pas incidentit, Lola Young reagoi në Instagram Stories, duke siguruar fansat se gjendja e saj është e qëndrueshme.
“Për këdo që pa performancën time sot në All Things Go, jam mirë tani. Faleminderit për gjithë mbështetjen tuaj. – Lola xxx”.
Kjo nuk është hera e parë që Lola përballet me sfida shëndetësore. Vetëm një ditë para incidentit, ajo anulloi një tjetër koncert të planifikuar në eventin “We Can Survive”, për arsye të cilësuara si "të ndjeshme" nga menaxheri i saj, Nick Shymansky.
“Lola është shumë e hapur për shëndetin e saj mendor,” – shkroi ai në rrjetet sociale.
“Ka ditë kur duhet të marrim masa mbrojtëse për mirëqenien e saj. Ajo i merr shumë seriozisht fansat, karrierën dhe performancat e saj.”
Këngëtarja e hitit “Messy” ka folur hapur më parë për luftën me çrregullimin skizoafektiv, me të cilin është diagnostikuar që në moshën 17-vjeçare, si dhe me varësinë ndaj substancave dhe ADHD-në.
Në një intervistë për The Guardian në gusht, ajo tha:
“Kam kaluar periudha të vështira. Turnetë më kanë lodhur emocionalisht, por kam punuar shumë me veten. Është një rrugëtim i vazhdueshëm.”
