Një aksident i rëndë ndodhi të shtunën në Artogne, Valcamonica të Breschia. Një 16-vjeçar shqiptar i identifikuar si Manuel Leti që po ngiste një motor “Duke 125” humbi jetën. I riu i lindur në Pian Camuno ishte zhvendosur në Artogne disa muaj më parë.
Sipas hetimeve të policisë dhe rrëfimeve të dëshmitarëve, i riu, i cili po ngiste dyrrotëshin e tij goditi cepin e përparmë të një Audi që drejtohej nga një 44-vjeçar. Ndoshta për shkak të shpërqendrimit ose një manovre të pamatur, ai u përpoq të kalonte Audin.
Kjo rezultoi fatale. Aksidenti ndodhi pak pas orës 14:30. Pasi mezi e preku makinën, motoçikleta u përmbys dhe u përplas në një shtyllë ndriçimi. Drejtuesi i ri u hodh nga vendi i tij dhe u përplas në tokë.
Kaska e tij nuk mundi ta amortizonte goditjen. Një mik që ngiste një motoçikletë tjetër pas tij pas goditjen e tmerrshme. Shërbimet e emergjencës reaguan menjëherë, me automjete mjekësore që nxituan në vendngjarje dhe një helikopter AREU që qëndronte në një distancë të shkurtër nga aksidenti për ta transportuar atë në spital.
Megjithatë, përpjekjet e punonjësve mjekësorë për ta ringjallur djalin ishin të kota. Lëndimet e tij në bark dhe në gjoks, ishin shumë serioze për të mbijetuar. Për disa orë, trupi i të riut mbeti në trotuar i mbuluar nga një mushama jeshile. Familja, e cila u njoftua menjëherë dhe u nis me nxitim për në vendngjarje shpërtheu në britma dëshpërimi.
Për ngjarjen reagoi edhe kryetarja e bashkisë së Artogne, Barbara Bonicelli që shkoi në vendin e aksidentit duke e quajtur atë një tragjedi të pakuptueshme. "Një tjetër jetë e re e humbur në rrugë," komentoi ajo, "dhe asgjë nuk mund ta lehtësojë dhimbjen dhe shqetësimin për ngjarje të këtij lloji."
Manueli kishte lindur në Itali dhe studioi shkenca kompjuterike në një qendër të formimit profesional. Nëna, babai, motra e madhe dhe vëllai i vogël janë në zi për humbjen. ©LAPSI.al
