Kryeministri i Kosovës, Albin Kurti, gjatë mbledhjes së Qeverisë së Kosovës ka komentuar pezullimin e dialogut strategjik nga Shtetet e Bashkuara të Amerikës.
Ai theksoi se, megjithatë, nuk janë prishur marrëdhëniet me SHBA-në, por se ka disa dallime mes dy vendeve. Kurti sqaroi se bëhet fjalë për pezullimin e planifikimit të dialogut strategjik, dhe jo të procesit të dialogut si të tillë.
Ai u shpreh se qeveria trajton seriozisht qëndrimet e Ambasadës amerikane dhe se opozitarët po e zmadhojnë situatën. Kryeministri theksoi angazhimin e tij për forcimin e raporteve me SHBA-në në tri shtylla: diplomatike, mbrojtje dhe zhvillim. Ai pranoi dallimet në diplomaci, sidomos në lidhje me Serbinë dhe strukturat ilegale të saj në Kosovë.
Sidoqoftë, Kurti theksoi se bashkëpunimi në fushën e mbrojtjes dhe zhvillimit po ecën mirë. Ai përmendi blerjen e pajisjeve ushtarake dhe heqjen e tarifës për produktet amerikane. Kurti e përfundoi duke thënë se lidhjet ndërmjet Kosovës dhe SHBA-së janë të thella dhe se komunikimi i vazhdueshëm do të sigurojë vazhdimin e bashkëpunimit.
