Aktorja e njohur Shailene Woodley dhe aktori i serialit Emily in Paris, Lucas Bravo, janë ndarë pas disa muajsh lidhjeje. Burime për revistën PEOPLE konfirmojnë se çifti i ka dhënë fund romancës që nisi publikisht në mars të këtij viti.
Të dy kanë fshirë fotot që kishin postuar së bashku nga llogaritë e tyre në Instagram. Bravo ka hequr postimin nga udhëtimi i tyre në Slab City, Kaliforni, që e kishte ndarë më 30 prill – momenti kur ata u bënë “zyrtarë” në rrjetet sociale. Nga ana tjetër, Woodley ka fshirë çdo postim të saj nga data 27 janar deri më 31 gusht, përfshirë dhe një foto të Bravo-s në Disneyland që ajo e kishte postuar për Ditën Ndërkombëtare të Star Wars.
Dyshja u panë për herë të fundit bashkë në publik më 4 gusht, në xhirimet e serialit Emily in Paris në Paris, ku Woodley shfaqej e përqafuar me aktorin francez. Një burim i afërt me aktoren deklaroi në gusht se “Lucas është i thjeshtë, i sjellshëm dhe emocionalisht i pranishëm. Miqtë e saj e adhurojnë atë.”
Burimi shtoi gjithashtu se lidhja e saj me Bravo-n ishte “e kundërta totale e dinamikës që kishte me Aaron Rodgers,” ish-fejuarin e saj, me të cilin u nda në vitin 2022.
