Ben Stiller ka zbuluar disa detaje të reja rreth pjesëmarrjes së Ariana Grande në filmin e ardhshëm të sagës, “Focker-in-Law”, që pritet të dalë në kinema më 25 nëntor 2026.
Duke folur për E! News në tapetin e kuq të Emmy Awards 2025, Stiller tha se aktorja e “Wicked” ka shkëlqyer në rolin e saj misterioz.
“Ajo është një profesioniste e vërtetë. Është shumë qesharake, shumë e talentuar. Ajo që po bën në këtë film është vërtet unike,” u shpreh ai.
Stiller, 59 vjeç, zbuloi gjithashtu se Grande është përshtatur natyrshëm me kastin, përfshirë Robert De Niro dhe Owen Wilson. “Ishte shumë kënaqësi të ishim në set me të, De Niron dhe madje edhe Owen Wilson që vendosi të na bashkohej,” shtoi ai.
Grande iu bashkua zyrtarisht kastit në maj 2025, ndërsa roli i saj konkret mbetet ende sekret.
Përveç Stiller dhe De Niro që rikthehen si Greg Focker dhe Jack Byrnes, gjithashtu janë konfirmuar edhe rikthimi i Blythe Danner (si Dina Byrnes) dhe Teri Polo (Pam). Ndërkohë, emra si Barbra Streisand dhe Dustin Hoffman – që luajtën prindërit e Greg në “Meet the Fockers” – janë ende në diskutim.
Streisand, në një intervistë për Variety në qershor, tha se “duhet të më paguajnë shumë mirë që të rikthehem”, duke treguar pakënaqësinë për pagesën në filmat e mëparshëm.
Filmi i ri, që do të mbajë titullin “Focker-in-Law”, do të shkruhet nga John Hamburg, i cili është autor edhe i tre filmave të parë të sagës.
