Egnatia arriti sot të marrë fitoren e parë në këtë edicion të Kategorisë Superiore, duke triumfuar në transfertë ndaj Bylis me rezultatin minimal 1-0. Përballja e zhvilluar në “Adush Muça” u karakterizua nga luftë e fortë fizike, ritëm i lartë dhe emocione deri në fund, duke konfirmuar rivalitetin mes dy skuadrave.
Që në minutat e para u duk qartë dëshira e rrogozhinasve për të marrë një rezultat pozitiv. Mundësia më e mirë iu dha në pjesën e parë, kur arbitri akordoi një 11-metërsh në favor të Egnatias. Megjithatë, Ndreca nuk arriti ta shfrytëzonte, pasi goditja e tij u neutralizua nga portieri vendas, duke i lënë shifrat të pandryshuara. Ky moment u kthye në pikë kthese, pasi Bylisi mori zemër dhe u përpoq të reagojë, por pa arritur të konkretizojë rastet e krijuara.
[video width="644" height="360" mp4="https://cdnimpuls.com/lapsi.al/wp-content/uploads/2025/09/68c583017a2b5.mp4"][/video]
Lexo më tej:Tirana nuk fiton as me Bordin, dridhet pankina e Garcia te Flamurtari
Në fraksionin e dytë të lojës, skuadra mike u shfaq më e qartë në ide dhe më e rrezikshme në sulm. Në minutën vendimtare, Ruçi u gjend në pozicionin e duhur dhe me një goditje precize e dërgoi topin në rrjetë, duke i dhënë Egnatias avantazhin e shumëpritur. Pavarësisht përpjekjeve të Bylisit për të barazuar, mbrojtja e rrogozhinasve rezistoi deri në fund dhe rezultati mbeti 0-1.
Falë këtij suksesi, Egnatia siguron tre pikët e para të sezonit, duke marrë një frymëmarrje të rëndësishme pas fillimit të vështirë. Ndërkohë, Bylisi mbetet me duar bosh, edhe pse tregoi se ka potencial për të vënë në vështirësi kundërshtarët.
