Princ Harry dhe babai i tij, Mbret Charles III, janë parë së bashku për herë të parë pas më shumë se një viti.
Duka i Sussex mbërriti në Clarence House të Londrës, ku zhvilloi një takim privat me monarkun. Sipas burimeve për Page Six, dyshja bisedoi për gati një orë – dyfishin e kohës krahasuar me takimin e tyre të fundit në shkurt 2024. Fotot e siguruara tregojnë Harry-n duke mbërritur me një SUV të zi në rezidencën e babait të tij.
Charles sapo ishte kthyer nga pushimet në Balmoral dhe gjithashtu u pa teksa hynte në Clarence House. Ky takim vjen pas raportimeve muajin e kaluar se ata po përgatiteshin për një ribashkim gjatë vizitës së fundit të Harry-t në Mbretëri të Bashkuar.
Duka ka qenë i angazhuar në disa aktivitete në Britani gjatë kësaj jave: mori pjesë në Çmimet WellChild 2025, vizitoi varrin e Mbretëreshës Elizabeth II në përvjetorin e vdekjes së saj dhe zhvilloi një vizitë në Imperial College London’s Centre for Blast Injury Studies.
Harry dhe Charles nuk kanë patur raporte të mira që prej vitit 2020, kur ai dhe Meghan Markle hoqën dorë nga detyrat mbretërore dhe u vendosën në Kaliforni me dy fëmijët e tyre, Princin Archie, 6 vjeç, dhe Princeshën Lilibet, 4 vjeç.
Megjithatë, burime pranë pallatit pohojnë se “pajtimi është i mundur.” Një burim për The Mirror tha:
“Nuk po pretendohet se problemet familjare janë zgjidhur, por ky është një fillim mes Charles dhe Harry.”
Ndërsa ka shpresë për afrimin me babain, raportet tregojnë se marrëdhënia e Harry-t me Princin William mbetet e ngrirë dhe shumë më e vështirë për t’u rikuperuar.
