Cardi B ka dalë fitimtare në një betejë ligjore në Los Anxhelos, pasi një juri unanime vendosi se ajo nuk ishte përgjegjëse në një padi civile për sulm dhe shpifje të ngritur nga ish-roja e saj e sigurisë, Emani Ellis.
Ellis kishte kërkuar 24 milionë dollarë dëmshpërblim, duke pretenduar se incidenti ndodhi në vitin 2018, gjatë një vizite të reperes te gjinekologu, kohë kur Cardi B ishte shtatzënë me vajzën e saj të parë, Kulture. Ajo akuzonte artisten për fyerje raciste dhe se e goditi me thonj në fytyrë, duke i shkaktuar dëmtime në faqe.
Megjithatë, Cardi B, 32 vjeçe, mohoi çdo përleshje fizike dhe dëshmoi në gjykatë se ishte shtatzënë dhe fizikisht e paaftë për përfshirje në një incident të tillë, duke theksuar se gjithçka ishte vetëm një debat verbal pas shkeljes së privatësisë së saj — roja e sigurisë dyshohet se e kishte filmuar pa leje.
Një dëshmitar nga stafi mjekësor në zyrën e OB-GYN në Beverly Hills po ashtu dëshmoi se nuk kishte parë ndonjë akt dhune nga ana e Cardi B, duke dobësuar ndjeshëm akuzat e paditëses.
Pas vendimit të gjykatës, burime për TMZ raportojnë se reperja planifikon të padisë Ellis për shpifje dhe dëmtim të imazhit të saj publik.
Vetëm disa orë pas vendimit të gjykatës, Cardi B u përfshi në një tjetër incident — këtë herë me një paparac. Teksa largohej nga gjykata, një fotograf e pyeti në lidhje me thashethemet për një shtatzëni të re, për të cilat thuhet se kishte folur bashkëshorti i saj i ndarë, Offset. Reperja reagoi ashpër duke i hedhur një stilolaps që ia mori një fansi pranë saj.
“Pse mendon se është në rregull të më bësh një pyetje të tillë? A i sheh gratë të më pyesin kështu?”, tha ajo e irrituar, duke shtuar: “Respekto gratë.”
Kjo nuk është hera e parë që Cardi B përballet me sfida ligjore. Në korrik të këtij viti, ajo është paditur për një incident të ndodhur në Las Vegas në vitin 2023, ku dyshohet se hodhi një mikrofon drejt një fansi gjatë një koncerti.
