Pengesa e radhës për marrëveshjen tregtare mes Bashkimit Europian dhe Shteteve të Bashkuara nuk vjen nga Uashingtoni, por nga vetë Brukseli. Grupi i Socialistëve në Parlamentin Europian ka dalë kundër akordit të arritur në korrik nga Ursula von der Leyen me Donald Trump, duke e bërë shumë të vështirë krijimin e shumicës së nevojshme për ratifikim.
“Ne jemi kundër marrëveshjes,” deklaroi Iratxe García Pérez, presidente e grupit S&D. Ky qëndrim jo vetëm që e minon përpjekjen e BE për të paraqitur unitet transatlantik përballë Moskës, por thellon edhe përçarjen me aleatët e von der Leyen në PPE, që mbështesin akordin.
Kritikë ndaj “dorëzimit” përballë Trump
Akordi i firmosur në Turnberry është kritikuar se i dha shumë avantazhe Uashingtonit, duke pranuar tarifa të reja amerikane prej 15% për shumicën e eksporteve europiane, ndërkohë që BE duhet të heqë doganat për mallrat industriale amerikane dhe të lehtësojë tregun për produkte bujqësore e deti.
García Pérez akuzoi Trump për “taktika bullizuese” dhe kërkoi përdorimin e instrumenteve të forta të BE për t’u mbrojtur, nëse SHBA kërcënon sërish me masa ndaj rregullave digjitale europiane. Edhe komisionerja socialiste Teresa Ribera paralajmëroi se BE duhet të jetë gati të tërhiqet nga marrëveshja, nëse SHBA nuk respekton zotimet.
Vota vendimtare në Parlament
Parlamenti Europian do të votojë për legjislacionin që heq tarifat mbi mallrat industriale amerikane, një parakusht që Uashingtoni të ulë doganat për makinat europiane nga 27.5% në 15%. Me Gjermaninë që e ka industrinë automobilistike si eksportin më të madh transatlantik, rreziku është i lartë.
Kryetari i Komisionit të Tregtisë në Parlament, Bernd Lange (S&D), paralajmëroi se BE duhet të ndalojë lëshimet nëse Trump nuk ul tarifat për makinat: “Nëse SHBA nuk e respekton marrëveshjen, atëherë as ne nuk do t’i ulim tarifat. Kjo është e qartë.”
Një betejë politike e hapur
Von der Leyen do të ketë nevojë për mbështetjen e të djathtës konservatore dhe madje edhe të ekstremit të djathtë, nëse socialistët refuzojnë të votojnë. Ekspertët e tregtisë paralajmërojnë se marrëveshja është e brishtë, e diskutueshme në raport me rregullat e Organizatës Botërore të Tregtisë dhe më shumë një kompromis politik sesa një fitore për tregun europian.
Nëse dështon, rreziku është rikthimi i luftës tregtare BE–SHBA dhe përplasjes me Trump, që tashmë ka paralajmëruar masa kundër çdo vendi që vendos taksa digjitale ndaj kompanive amerikane.
Përshtati nga Politico në shqip ©LAPSI.AL
