Debate të shpeshta për çështje të parëndësishme. Diskutime gjithnjë e më të nxehta për kufijtë e pronës. Këto debate besohet të kenë qenë motivi kryesor që e shtyu fqinjin italian të shqiptarit Fatos Cenaj të planifikonte pritën në Fontaniva më 8 qershor që çoi në vdekjen e 58-vjeçarit pas tre ditësh agoni.
“TG Padova” shkruan se vrasësi që planifikoi dhe ekzekutoi vrasjen e Cenajt “nuk erdhi, pra, nga lindja” dhe nuk bëhej fjalë për ndonjë hakmarrje. Përkundrazi, duket se ishte "fqinji" i derës ngjitur, tani nën hetim për vrasje me dashje. I dyshuari është me origjinë italiane dhe punon si punëtor në një fabrikë lokale. Familja e 58-vjeçarit shqiptar kishte aq shumë frikë prej tij saqë u largua pas vdekjes së tij.
Italiani po trajtohet në Qendrën e Shëndetit Mendor ULSS 6 dhe aktualisht është i lirë, pasi iu dorëzua një njoftim paraprak hetimi në ditët pas krimit. Shtëpia e tij është kontrolluar tashmë nga Karabinierët, të cilët po kryejnë hetimin e tyre dhe që me sa duket e kanë kurthuar atë falë pamjeve të mbikëqyrjes lokale.
Kjo është hipoteza e hetuesve: mëngjesin e 8 qershorit, i dyshuari e priste viktimën, i fshehur midis pemëve, disa qindra metra larg fermës Dindo, ku punonte Cenaj. Kur e pa të kalonte me triçikletën e tij, qëlloi me armë zjarri. Plumbi e goditi 58-vjeçarin nga pas, pak mbi vesh, duke e lënë pa ndjenja.
Me sa duket, i dyshuari mori gëzhojën dhe iku me biçikletën e tij, duke u zhdukur pa lënë gjurmë. Fatos Cenaj vdiq në spital disa ditë më vonë. Rezultatet e analizës balistike që po kruhen nga karabinierët e Parmës priten në ditët në vijim. ©LAPSI.al
