Mediat italiane kanë zbuluar detaje të reja nga hetimet për vrasjen e shqiptarit Fatos Cenajt, një ish-oficer burgu 59-vjeçar, i gjetur i vdekur më 8 qershor në një rrugicë fshati në Fontaniva, në zonën e Padovës. RAI shkruan se karabinierët kanë identifikuar autorin e dyshuar, i cili tani është zyrtarisht nën hetim për vrasje të qëllimshme. Sipas hetuesve, ai e qëlloi viktimën me një plumb në kokë. Kjo hedh poshtë dyshimet fillestare se të shtënat ishin aksidentale.
Zëvendësprokurorja Maria Ignazia D'Arpa, përgjegjëse për çështjen, i konsideroi gjetjet e hetimeve të kryer nga njësia e Karabinierëve të Padovës si të bazuara në prova. Pista kryesore e hetimit mbetet hakmarrja, megjithëse konteksti në të cilin ka lindur konflikti është ende i paqartë. Emri i të dyshuarit nuk është bërë i ditur. Ai është duke u ndihmuar nga avokatët e tij.
I dyshuari është identifikuar nga pamjet e kamerave të sigurisë dhe deklaratat e dëshmitarëve. Kjo bëri që hetimi të ndryshojë drejtim, duke u distancuar nga teoria e një aksidenti.
Më 8 qershor, si çdo mëngjes, Cenaj po udhëtonte me një triçikletë në rrugën nga shtëpia deri në stallën e kalërimit ku punonte. Një dëshmitar dëgjoi një të shtënë me armë zjarri. Disa minuta më vonë, dy roje peshkimi e gjetën 58-vjeçarin të shtrirë përtokë, duke vdekur. Fillimisht, u supozua se ai ishte rrëzuar. Në spital mjekët zbuluan një plagë plumbi në kokën e tij. Pas tre ditësh agoni, shqiptari ndërroi jetë.
Një ish-oficer burgu në Shqipëri, Cenaj, kishte jetuar në Fontaniva me gruan dhe vajzën e tij për 2 vjet. Gazetat e përshkruan atë si një person të thjeshtë dhe punëtor. Në stallën e kalërimit, ai bënte punë të vogla dhe kujdesej për kuajt, njeri i thjeshtë dhe i kënaqur që ndihej i dobishëm. Familja e tronditur u largua nga shtëpia pas incidentit. "Pas asaj që ndodhi, ata preferuan të shkonin të jetonin me një të afërm. Ata kishin frikë të qëndronin aty", tha një fqinj.
Për më shumë se dy muaj, Karabinierët punuan për të rindërtuar rrethanat. Pamjet e kamerave të sigurisë nga zona dhe disa dëshmi nga njerëz që e njihnin Fatosin besohet se kanë ofruar një pikë kthese. Hetuesit u kthyen në stallat e kalërimit disa herë ku konfirmuan se ai nuk kishte ndonjë konflikt apo kërcënim në lidhje me jetën e tij në Itali. Për këtë arsye, vëmendja u përqendrua në të kaluarën e tij në Shqipëri.
Autoritetet italiane po bashkëpunojnë me ato shqiptare për të hartëzuar marrëdhëniet, mosmarrëveshjet e mundshme dhe armiqtë e mundshëm prej kohësh. Janë intervistuar disa persona, përfshirë anëtarë të familjes, të njohur dhe banorë. ©LAPSI.al
